புதுவை சுயேச்சை எம்எல்ஏக்களுக்கும் பாஜகவுக்கும் எந்தத் தொடா்பும் இல்லை: மாநிலத் தலைவா் வி.பி. ராமலிங்கம்!

புதுவையில் சுயேச்சை எம்எல்ஏ.க்களுக்கும், பாஜகவுக்கும் எந்தத் தொடா்பும் இல்லை என்று அக்கட்சியின் மாநிலத் தலைவா் வி.பி. ராமலிங்கம் தெரிவித்தாா்.

புதுவையில் முதல்வா் ரங்கசாமி தலைமையில் என்.ஆா்.காங்கிரஸ்- பாஜக கூட்டணி ஆட்சி நடக்கிறது. என்ஆா்.காங்கிரசுக்கு 10, பாஜகவுக்கு 6 எம்எல்ஏக்கள் மற்றும் 3 நியமன எம்எல்ஏக்கள் உள்ளனா்.

கடந்த சட்டப்பேரவைத் தோ்தலில், தோ்வு செய்யப்பட்ட 6 சுயேச்சை எம்எல்ஏக்களில் அங்காளன், சிவசங்கரன், சீனிவாச அசோக் ஆகியோா் பாஜகவுக்கு ஆதரவாக இருந்தனா்.

அண்மைக்காலமாக பாஜக ஆதரவு சுயேச்சை எம்எல்ஏக்கள் நிலைப்பாட்டில் மாற்றம் ஏற்பட்டுள்ளது. அவா்கள் வேறு ஒரு புதிய இயக்கத்துக்கு ஆதரவாகச் செயல்படுகின்றனா். இந்நிலையில் பாஜக மாநில தலைவா் வி.பி.ராமலிங்கம், சுயேச்சை எம்எல்ஏக்களுக்கும், பாஜகவுக்கும் எந்த தொடா்பும் இல்லை என சனிக்கிழமை அறிவித்தாா்.

இதுதொடா்பாக அவா் செய்தியாளா்களிடம் சனிக்கிழமை கூறியது: பாஜக ஒருபோதும் இரண்டாம் தர அரசியல் செய்ய விரும்பாது. புதுவை அரசுக்கு சுயேச்சை எம்எல்ஏக்கள் அங்காளன், சிவசங்கரன் ஆகியோா் ஆதரவு கொடுத்தனா். அவா்களது நடவடிக்கை சரியில்லை என்பதால், எந்த நிகழ்ச்சிக்கும் அவா்களை நாங்கள் அழைப்பது இல்லை.

பாஜகவுக்கும், சுயேச்சை எம்எல்ஏகளுக்கும் எந்த தொடா்பும் இல்லை. பாஜகவினா் சுயேச்சை எம்எல்ஏக்களுடன் தொடா்பில் இருந்தால் அவா்கள் விலக்கி வைக்கப்படுவாா்கள்.

அமைச்சா் ஜான்குமாா் நடவடிக்கையை தலைமை வரை கொண்டு சென்றுள்ளோம். அரசுக்கு எதிராக இலை மறைவு, காய் மறைவாக சில வேலைகள் நடக்கிறது என்பதை தலைமைக்கு தெரிவித்துள்ளோம் என்றாா் வி.பி.ராமலிங்கம்.

பேட்டியின்போது கட்சியின் தேசிய செய்தித் தொடா்பாளா் சி.ஆா். கேசவன், பாஜக புதுவை செய்தித் தொடா்பாளா் அருள்முருகன், கட்சியின் புதுவை ஊடகப் பிரிவுத் தலைவா் நாகேஸ்வரன் ஆகியோா் உடனிருந்தனா்.