பெண் கல்வியை ஊக்குவிக்க நடவடிக்கை: குழந்தைகள் பாதுகாப்புக்குழு கூட்டத்தில் முடிவு

மாணவ, மாணவிகள் பள்ளி இடை நிற்றலைக் கண்டறிந்து பள்ளி செல்ல வைப்பது, பெண் கல்வியை ஊக்குவிப்பது குறித்து நகா்மன்ற, குழந்தைகள் பாதுகாப்புக் குழுக் கூட்டத்தில் முடிவு செய்யப்பட்டுள்ளது.

தருமபுரி நகராட்சி அலுவலகத்தில், நகராட்சி அளவிலான குழந்தைகள் பாதுகாப்புக் குழு இரண்டாவது ‘காலாண்டு கூட்டம் வியாழக்கிழமை நடைபெற்றது. நகா்மன்ற ஆணையா் ஆா். சேகா் தலைமை வகித்தாா். நகா்மன்றத் தலைவா் லட்சுமிமாது முன்னிலை வகித்தாா். மாவட்ட குழந்தைகள் நல பாதுகாப்பு அலுவலா் ஜெயசீலன், தொழிலாளா் துணை ஆணையா் திவ்யா, தருமபுரி நகர அனைத்து மகளிா் காவல் நிலைய உதவி ஆய்வாளா் கீதா, இளம்சிறாா் நீதிக் குழுமத்தின் அலுவலா் பிரேமா, நகராட்சி நடுநிலைப் பள்ளி மற்றும் உயா்நிலைப் பள்ளிகளின் ஆசிரியா்கள், தன்னாா்வ தொண்டு நிறுவனத்தினா், நகராட்சி வாா்டு பிரதிநிதிகள், அலுவலா்கள் கலந்துகொண்டனா்.

இக்கூட்டத்தில் பள்ளி செல்லும் மாணவ, மாணவிகள் இடை நிற்றலைக் கண்டறிந்து அவா்களை மீண்டும் பள்ளி செல்ல வைப்பது, பெண் கல்வியை ஊக்கவிப்பது, இளம்வயது ( சிறாா்) திருமணங்கள், சிறுமிகள் கா்ப்பமடைதலைத் தடுக்கும் விழிப்புணா்வை ஏற்படுத்துவது உள்ளிட்ட விவகாரங்கள் குறித்து கலந்தாலோசித்து முடிவு செய்யப்பட்டது.