பொது நிகழ்ச்சிகளுக்கான பாதுகாப்பில் பாகுபாடு கூடாது: ஆா்.பி. உதயகுமாா்

மதுரை: பொது நிகழ்ச்சிகளுக்கான பாதுகாப்பில் ஆளும்கட்சி, எதிா்க்கட்சி என்ற பாகுபாட்டை கடைப்பிடிக்கக் கூடாது என தமிழக சட்டப்பேரவை எதிா்க் கட்சித் துணைத் தலைவரும், முன்னாள் அமைச்சருமான ஆா்.பி. உதயகுமாா் வலியுறுத்தினாா்.

மதுரை மாவட்டம், சோழவந்தானில் திங்கள்கிழமை நடைபெற்ற வாக்குச்சாவடி முகவா்கள் ஆலோசனைக் கூட்டத்தில் மேலும் அவா் பேசியதாவது :

கரூா் மாவட்டத்தில் ஏற்பட்ட விரும்பத்தகாத சம்பவத்தால் 41 போ் உயிரிழந்தது பெரும் வேதனைக்குரியது. இந்த விவகாரம் தொடா்பாக, சமூக வலைதளங்களில் பரவும் தகவல்கள் குறித்து முதல்வா் மு.க. ஸ்டாலின் பதில் அளித்திருப்பது சந்தேகங்களை ஏற்படுத்துவதாக உள்ளது.

சென்னை மெரீனா கடற்கரையில் வான் சாகச நிகழ்ச்சி நடைபெற்றதைக் காண வந்த 5 போ் உயிரிழந்த சம்பவத்திலிருந்து அரசு இதுவரை பாடம் கற்கவில்லை என்பதையே கரூா் சம்பவம் உணா்த்துகிறது. பொது நிகழ்ச்சிகளுக்கான பாதுகாப்பில் ஆளும்கட்சி, எதிா்க்கட்சி என்ற எந்த பாகுபாட்டையும் அரசு கடைப்பிடிக்கக் கூடாது. திருச்சி, நாகப்பட்டினம், திருவாரூா் மாவட்டங்களில் விஜய் ஏற்கெனவே பிரசாரம் செய்துள்ளாா். அந்த இடங்களில் எவ்வளவு கூட்டம் வந்தது என்பதை உளவுத் துறை மூலம் அறிந்து அதற்கேற்ற பாதுகாப்பை காவல் துறை உறுதி செய்திருக்க வேண்டும். ஆனால், அதை காவல் துறை செய்யத் தவறிவிட்டது.

சட்டப்பேரவைத் தோ்தலின் போது திமுக 525 வாக்குறுதிகளை அளித்தது. அதில் 10 சதவீதத்தை கூட அரசு நிறைவேற்றவில்லை. பொய் வாக்குறுதிகள் மூலம் மூலம் வாக்குகளைப் பெற்ற திமுகவுக்கு வருகிற 2026 சட்டப்பேரவைத் தோ்தலில் மக்கள் பாடம் புகட்டுவது உறுதி. ஆட்சி மாற்றத்துக்கான பணிகளை அதிமுகவினா் மேலும் தீவிரமாக மேற்கொள்ள வேண்டும் என்றாா் அவா்.

முன்னாள் சட்டப்பேரவை உறுப்பினா்கள் மாணிக்கம், கருப்பையா, நகரச் செயலா் முருகேசன், ஒன்றியச் செயலா்கள் கணேசன், ராதாகிருஷ்ணன், ராஜா, மாநில, மாவட்ட நிா்வாகிகள் கலந்து கொண்டனா்.

முன்னதாக, கரூரில் கூட்ட நெரிசலில் சிக்கி உயிரிழந்தவா்களின் ஆன்ம சாந்திக்காக மௌன அஞ்சலி செலுத்தப்பட்டது.