பொன்முடி மீது நடவடிக்கை எடுக்க அஞ்சுகிறாா் முதல்வா்: நயினாா் நாகேந்திரன்

அமைச்சா் பொன்முடி மீது நடவடிக்கை எடுக்க முதல்வா் அஞ்சுகிறாா் என்று குற்றஞ்சாட்டினாா் தமிழக பாஜக தலைவா் நயினாா் நாகேந்திரன் எம்.எல்.ஏ.

திருநெல்வேலியில் செய்தியாளா்களிடம் அவா் திங்கள்கிழமை கூறியதாவது: பாரத பிரதமா் நரேந்திர மோடி மற்றும் தேசிய தலைவா் நட்டா, உள்துறை அமைச்சா் அமித்ஷா ஆகியோா் தமிழகத்தின் பாஜக தலைவா் என்ற மிகப்பெரிய பொறுப்பி னை எனக்கு வழங்கியுள்ளனா்.அரசியலமைப்புச் சட்டத்தை இயற்றியவா் அம்பேத்கா். ஆனால், அரசியல் சாசன சபையில் அம்பேத்கருக்கு இடத்தை கொடுக்க காங்கிரஸ் மறுத்தது. அவரது நினைவிடங்களைக் கூட காங்கிரஸ் பராமரிக்கவில்லை.

பாரதிய ஜனதா கட்சி பொறுப்பேற்ற பின்னா் அம்பேத்கரின் நினைவாலயம் உள்ளிட்ட பல்வேறு இடங்கள் புதுப்பிக்கப்பட்டுள்ளன. அதற்கு பிரதமா் மோடியே காரணம். தோ்தலுக்கு இன்னும் ஓராண்டு காலம் உள்ளது. துணை முதல்வா் பதவி உள்ளிட்டவை குறித்து இப்போதைக்கு எந்தப் பேச்சுவாா்த்தையும் நடத்தவில்லை.அமைச்சா் பொன்முடி பேசிய பேச்சு அரசியலமைப்புச் சட்டத்திற்கு எதிரானது.

அவரது பேச்சையும், திமுகவின் மக்கள் விரோத செயல்களையும் நினைத்து பாா்த்து மக்கள் வரும் சட்டப்பேரவைத் தோ்தலில் வாக்களிக்க வேண்டும். அமைச்சா் பொன்முடி விவகாரத்தில் கடும் நடவடிக்கை எடுக்க முதல்வா் அஞ்சுகிறாா். போக்குவரத்து துறை பொதுமக்களுக்கு தேவையான அத்தியாவசியத்துறை என்பதனால் அரசு எடுத்து நடத்துகிறது.

இத்துறையில் ஏற்படக்கூடிய நஷ்டத்தை அரசு முறையாக நிதி ஒதுக்கி நிவா்த்தியாக்கி கொடுக்க வேண்டும். ஆனால், இங்கு தொழிலாளா்கள் வஞ்சிக்கப்படும் நிலை உள்ளது என்றாா் அவா்.