மதுரை தவெக மாநாட்டில் பங்கேற்ற இளைஞா் உயிரிழப்பு

மதுரையில் வியாழக்கிழமை நடைபெற்ற தமிழக வெற்றிக் கழக மாநாட்டில் கலந்து கொண்ட கோத்தகிரியைச் சோ்ந்த இளைஞா் மயங்கி விழுந்து உயிரிழந்தாா்.

நீலகிரி மாவட்டம், கோத்தகிரி அருகே பாப்பஸ் காலனி பகுதியைச்  சோ்ந்தவா் தூய்மைப் பணியாளா்  குமாா். இவரது மகன் ரோஷன்  (18). இவா் தனது நண்பா்களுடன் மதுரையில் நடைபெற்ற தமிழக வெற்றிக் கழக மாநாட்டில் பங்கேற்க வியாழக்கிழமை சென்றுள்ளாா்.

மாநாட்டை முடித்துவிட்டு  வெளியில் வரும்போது  மூச்சுத் திணறல் ஏற்பட்டு மயங்கி விழுந்துள்ளாா். இதையடுத்து அவரது நண்பா்கள் அவரை மீட்டு அருகில் உள்ள மருத்துவமனைக்கு  கொண்டு சென்றனா் . அங்கு முதலுதவி சிகிச்சைக்குப் பின் ரோஷன் தனது சொந்த ஊரான கோத்தகிரிக்கு நண்பா்களுடன் திரும்பியுள்ளாா். சமயநல்லூா் பகுதியில் வந்துகொண்டிருந்தபோது ரோஷனுக்கு மீண்டும் மூச்சுத் திணறல் ஏற்பட்டுள்ளது. இதையடுத்து அப்பகுதியில் உள்ள அரசு மருத்துவமனைக்கு கொண்டு செல்லப்பட்டாா்.

அங்கு பரிசோதனையில், ரோஷன் ஏற்கெனவே இறந்து விட்டதாக மருத்துவா்கள் தெரிவித்துள்ளனா். ரோஷனின் தந்தை  தூய்மைப் பணியாளராக பணியாற்றி வரும் நிலையில்,  தாயாா்  சுதா மனநிலை பாதிக்கப்பட்டவராகவும், 15 வயது தங்கை சிறு வயது முதலே  சா்க்கரை நோயால் பாதிக்கப்பட்டராகவும் உள்ளனா். குடும்பத்தில் நிலவும் வறுமை காரணமாக   ரோஷன் கூரியா் வேலைக்குச் சென்று  தனது குடும்பத்தைக் காப்பாற்றி வந்ததாக உறவினா்கள் தெரிவித்துள்ளனா்.