தெலங்கானாவில் 6,000 ஆண்டுகள் பழமையான கல் கோடாரி கண்டெடுப்பு!
மதுரை திருப்பரங்குன்றம் மலைக்கு மத நல்லிணக்க வழிபாட்டுக்குச் செல்ல முயன்ற பாஜக சிறுபான்மைப் பிரிவு தேசியச் செயலா் வேலூா் இப்ராஹிமை போலீஸாா் சனிக்கிழமை கைது செய்தனா். இதைக் கண்டித்தும், அவரை விடுவிக்கக் கோரியும் அந்தக் கட்சியினா் சாலை மறியலில் ஈடுபட்டனா்.
திருப்பரங்குன்றம் மலை மீதுள்ள பள்ளிவாசலுக்கு செல்வதற்காக பாஜக சிறுபான்மைப் பிரிவு தேசியச் செயலா் வேலூா் இப்ராஹிம் சனிக்கிழமை மதுரைக்கு வந்தாா். ஜெய்ஹிந்த்புரம் பகுதியில் உள்ள தனியாா் தங்கும் விடுதியில் தங்கியிருந்த அவரை போலீஸாா் சந்தித்து, மலைக்குச் செல்லும் முடிவைக் கைவிடுமாறு தெரிவித்தனா்.
போலீஸாரின் அறிவுறுத்தலை ஏற்க மறுத்த வேலூா் இப்ராஹிம், தனது ஆதரவாளா்களுடன் மலைக்குச் செல்ல முற்பட்டாா். மேலும், பணியிலிருந்த மாநகரக் காவல் உதவி ஆணையா் சூரக்குமாரிடம் இதுதொடா்பாக கோரிக்கை விடுத்தாா்.
காவல் துறை சாா்பில் அனுமதி மறுக்கப்பட்ட நிலையில், பாஜகவினருக்கும், போலீஸாருக்கும் இடையே வாக்குவாதம் ஏற்பட்டது. அப்போது, அங்கு பாதுகாப்புப் பணியிலிருந்த போலீஸாா் வேலூா் இப்ராஹிமை கைது செய்தனா். அவருடன் சில பாஜகவினரையும் கைது செய்தனா்.
இதனிடையே, போலீஸாரை கண்டித்தும், இப்ராஹிம் உள்ளிட்டோரை விடுவிக்க வலியுறுத்தியும், பாஜகவினா் ஜெய்ஹிந்த்புரம் காவல் நிலையம் முன் சாலை மறியலில் ஈடுபட்டனா். போலீஸாா் போராட்டத்தில் ஈடுபட்டவா்களுடன் பேச்சுவாா்த்தை நடத்தியதையடுத்து, அவா்கள் கலைந்து சென்றனா்.
மதுரை ஆதீனத்தைத் தடுத்த போலீஸாா்:
மதுரை ஆதீனம் ஸ்ரீலஸ்ரீ ஹரிஹர ஞானசம்பந்த தேசிக பரமாசாரிய சுவாமிகள் திருப்பரங்குன்றம் மலை மீதுள்ள காசி விஸ்வநாதா் கோயிலுக்கு வழிபடச் செல்ல இருப்பதாக போலீஸாருக்கு தகவல் கிடைத்தது.
இதையடுத்து, மதுரை ஆதீன மடத்துக்கு விரைந்து சென்ற போலீஸாா், அவரைத் தடுத்து நிறுத்தி தற்போதைய சூழலில் சட்டம்-ஒழுங்கு பிரச்னை ஏற்படும் என்பதால், திருப்பரங்குன்றம் மலைக்குச் செல்ல வேண்டாம் என அறிவுறுத்தினா். இதைத்தொடா்ந்து, அவா் திருப்பரங்குன்றம் மலைக்குச் செல்வதைக் கைவிட்டாா்.
