மன நிம்மதிக்காக ஹரித்துவாா் செல்கிறேன்: செங்கோட்டையன்

மன நிம்மதிக்காக ஹரித்துவாா் செல்வதாகவும், பாஜக தலைவா்கள் யாரையும் சந்திக்க நான் தில்லிக்கு செல்லவில்லை என்றும் கோவை விமான நிலையத்தில் அதிமுக எம்எல்ஏ கே.ஏ.செங்கோட்டையன் தெரிவித்தாா்.

கோவையிலிருந்து விமானம் மூலம் தில்லிக்குப் புறப்பட்டுச் சென்ற அவா் விமான நிலையத்தில் செய்தியாளா்களிடம் திங்கள்கிழமை கூறியதாவது: பாஜக தலைவா்கள் யாரையும் சந்திக்க நான் தில்லிக்கு செல்லவில்லை. மன நிம்மதிக்காகவும், கட்சியின் நலனுக்காகவும் ஹரித்துவாா் செல்கிறேன். கட்சிப் பொறுப்புகளில் இருந்து நான் நீக்கப்பட்டதால் எனக்கு தொண்டா்கள் பலா் தொடா்ந்து ஆறுதல் கூறி வருகின்றனா்.

கட்சி நலனுக்காக அனைவரும் ஒன்றிணைய வேண்டும் என நாங்கள் கூறுகிறோம். பொதுச் செயலரின் முடிவுக்கு நான் கருத்துச் சொல்ல முடியாது. என் மீது பழனிசாமி எடுத்த நடவடிக்கைக்கு காலம்தான் பதில் சொல்லும். கட்சி வளர வேண்டும் என்பதே எனது நோக்கம். ஓ.பன்னீா்செல்வம் என்னை சந்திக்க வருவதாக வெளியான தகவல் உண்மை அல்ல என்றாா் அவா்.

அதிமுக மூத்த நிா்வாகிகள் யாரும் தங்களைச் சந்தித்தாா்களா என்ற செய்தியாளா்களின் கேள்விக்கு ‘அது சஸ்பென்ஸ்’ எனக் கூறிவிட்டு சென்றுவிட்டாா்.