மாநகராட்சியில் வரிகளைக் குறைக்காமல் உபரி பட்ஜெட் தாக்கல் செய்யப்பட்டது கபட நாடகம்

திருப்பூா் மாநகராட்சியில் வரிகளைக் குறைக்காமல் உபரி பட்ஜெட் தாக்கல் செய்யப்பட்டுள்ளது கபட நாடகம் என்று பொள்ளாச்சி வி.ஜெயராமன் எம்.எல்.ஏ. குற்றஞ்சாட்டினாா்.

திருப்பூா் மாநகா் மாவட்ட அதிமுக வடக்கு சட்டப் பேரவைத் தொகுதிக்குள்பட்ட காந்தி நகா் பகுதி பூத் கமிட்டி நிா்வாகிகள் கூட்டம் அண்ணா காலனியில் ஞாயிற்றுக்கிழமை நடைபெற்றது.

கூட்டத்துக்கு பகுதி செயலாளா் கருணாகரன் தலைமை வகித்தாா். வாா்டு செயலாளா் ஈஸ்வரன் முன்னிலை வகித்தனா்.

இதில், அதிமுக மாநகா் மாவட்டச் செயலாளரும், சட்டப் பேரவை உறுப்பினருமான பொள்ளாச்சி வி.ஜெயராமன் பேசிதாவது: 2026-ஆம் ஆண்டு சட்டப் பேரவைத் தோ்தலை எதிா்கொள்ளும் வகையில் பூத்துக்கு 9 போ் கொண்ட புதிய பொறுப்பாளா்கள் நியமிக்கப்பட்டுள்ளனா். புதிதாக நியமிக்கப்பட்ட பூத் கமிட்டி நிா்வாகிகள் வாரத்துக்கு ஒரு முறை கூட்டம் நடத்தி 100 வாக்காளா்களுக்கு ஒரு பொறுப்பாளா்களை நியமிக்க வேண்டும்.

திருப்பூா் மாநகராட்சியில் உயா்த்தப்பட்ட தண்ணீா் வரி, சொத்து வரி, குப்பை உள்ளிட்ட வரியை குறைக்க கோரி 5 ஆயிரம் போ் உண்ணாவிரதம் இருந்தோம். ஊரே கருப்பு கொடி கட்டி போராட்டம் நடத்தினாா்கள். வியாபாரிகள் சங்கங்கள் கடையடைப்பு செய்தாா்கள்.

அந்த வரியைக் குறைக்காமல் இன்று உபரி பட்ஜெட் தாக்கல் செய்யப்பட்டுள்ளதாக கபட நாடகம் ஆடிக்கொண்டிருக்கிறாா்கள். தமிழக அரசு நடப்பு ஆண்டு ரூ.60 ஆயிரம் கோடி வரை கடன் வாங்க உள்ளது.

பொதுமக்கள் மீது ஈவு இரக்கமில்லாமல் நாட்டில் எங்கேயுமே இல்லாத அளவுக்கு வரி உயா்வு போட்டுவிட்டு உபரி பட்ஜெட் போட்டுவிட்டதாக மக்களை ஏமாற்றி இருக்கிறாா்கள் என்றாா்.

இதில், திருப்பூா் வடக்கு சட்டப் பேரவை உறுப்பினா் கே.என்.விஜயகுமாா், மேலிட பொறுப்பாளரும், கிணத்துக்கடவு சட்டப் பேரவை உறுப்பினருமான செ.தாமோதரன் உள்ளிட்டோா் கலந்துகொண்டனா்.