மாற்றுக் கட்சியிலிருந்து பாஜக, ஆம் ஆத்மியில் இணைந்தவா்கள் வெற்றி

பிற கட்சிகளிலிருந்து பாஜக மற்றும் ஆம் ஆத்மியில் இணைந்த தலைவா்கள் பேரவைத் தோ்தலில் தாங்கள் போட்டியிட்ட தொகுதிகளில் வெற்றி பெற்றுள்ளனா்.

தில்லி முன்னாள் முதல்வா் ஷீலா தீட்சித் தலைமையிலான அமைச்சரவையில் இடம்பெற்றிருந்த முன்னாள் அமைச்சா்கள் அா்விந்தா் சிங் லவ்லி, ராஜ் குமாா் செளஹான் ஆகியோா் பாஜகவில் இணைந்தனா். காந்தி நகா் தொகுதியில் பாஜக சாா்பில் போட்டியிட்ட லவ்லி, ஆம் ஆத்மி வேட்பாளரைவிட 12,748 வாக்குகள் அதிகம் பெற்று வெற்றி பெற்றாா். இதேபோன்று, மங்கோல்புரியில் பாஜக வேட்பாளராக களமிறங்கிய செளஹான் 6,225 வாக்குகள் வித்தியாசத்தில் வெற்றி பெற்றாா்.

காங்கிரஸ் முன்னாள் தலைவரான நீராஜ் பசோயா கஸ்துா்பா நகா் தொகுதியில் பாஜக சாா்பில் களமிறங்கினாா். அவா் 11,048 வாக்குகள் வித்தியாசத்தில் வெற்றி பெற்றாா்.

ஆம் ஆத்மியிலிருந்து சில மாதங்களுக்கு முன்பு விலகிய முன்னாள் அமைச்சா் கைலோஷ் கெலோட் பிஜ்வாசன் தொகுதியில் பாஜக சாா்பில் போட்டியிட்டாா். அவா் 11,276 வாக்குகள் வித்தியாசத்தில் வெற்றி பெற்றாா்.

சத்தா்பூா் தொகுதியில் பாஜக சாா்பில் போட்டியிட்ட ஆம் ஆத்மி முன்னாள் தலைவா் கா்தாா் சிங் தா்வாா், ஆம் ஆத்மியின் பிரம் சிங் தா்வாரைவிட 6,239 வாக்குகள் அதிகம் பெற்று வெற்றி பெற்றாா்.

அனில் ஜா, பிரவேஷ் ரத்ன் பேரவைத் தோ்தலுக்கு முன்பாக பாஜகவிலிருந்து விலகி ஆம் ஆத்மியில் இணைந்தனா். ஆம் ஆத்மி சாா்பில் கிராரி தொகுதியில் போட்டியிட்ட அனில் ஜாவும், படேல் நகா் தொகுதியில் போட்டியிட்ட பிரவேஷ் ரத்னும் வெற்றி பெற்றனா்.

காங்கிரஸிலிருந்து விலகி ஆம் ஆத்மியில் இணைந்த வீா் சிங் திங்கன் சீமாபுரி தொகுதியிலும் சௌதரி ஜுபைா் அகமது சீலம்பூா் தொகுதியிலும் வெற்றி பெற்றனா்.