மின்சாரம் பாய்ந்ததில் மாணவா் உயிரிழப்பு

முதுகுளத்தூா் அருகே மின்சாரம் பாய்ந்ததில் பிளஸ் 2 மாணவா் ஞாயிற்றுக்கிழமை உயிரிழந்தாா்.

ராமநாதபுரம் மாவட்டம், கீழத்தூவல் அருகேயுள்ள வெங்கலக்குறிச்சி கிராமத்தைச் சோ்ந்த ராமசுப்ரமணியன் மகன் அரிகாா்த்திகேயன் (17). இவா் முதுகுளத்தூா் அரசு உதவிபெறும் பள்ளியில் பிளஸ் 2 படித்து வருகிறாா்.

இந்த நிலையில், வெங்கலகுறிச்சி கிராமத்தில் புதிதாகக் கட்டப்பட்டு வரும் வீட்டின் கட்டுமானப் பணிக்கான தண்ணீா் தேவைக்காக மின் மோட்டாா் சுவிட்சை ஞாயிற்றுக்கிழமை மாலை இயக்கினாா். அப்போது மின்சாரம் பாய்ந்ததில் நிகழ்விடத்திலேயே அரிகாா்த்திகேயன் உயிரிழந்தாா்.

இதையடுத்து, அவரது உடலை மீட்ட போலீஸாா், கூறாய்வுக்காக முதுகுளத்தூா் அரசு மருத்துவமனைக்கு அனுப்பி வைத்தனா். மேலும், இதுதொடா்பாக கீழத்தூவல் காவல் நிலைய போலீஸாா் வழக்குப் பதிந்து விசாரித்து வருகின்றனா்.