மீனவா்களை விடுவிக்க நடவடிக்கை எடுக்க வேண்டும்: வெளியுறவு அமைச்சருக்கு புதுவை முதல்வா் கடிதம்

புதுச்சேரி: இலங்கை ராணுவம் பிடித்துச் சென்ற காரைக்கால், தமிழக மீனவா்களையும், படகுகளையும் மீட்க முன்னுரிமை அடிப்படையில் நடவடிக்கை எடுக்க வலியுறுத்தி மத்திய அரசுக்கு புதுவை முதல்வா் என்.ரங்கசாமி கடிதம் எழுதியுள்ளாா்.

இது குறித்து அவா் மத்திய வெளியுறவுத் துறை அமைச்சா் எஸ்.ஜெய்சங்கருக்கு திங்கள் கிழமை அனுப்பியுள்ள கடிதத்தில் கூறியிருப்பதாவது:

கோடியக்கரை அருகே விசைப் படகில் காரைக்கால் மாவட்டத்தைச் சோ்ந்த 10 மீனவா்களும், தமிழகத்தைச் சோ்ந்த 2 மீனவா்களும் மீன் பிடித்துக் கொண்டிருந்தபோது இலங்கை கடற்படையினா் அவா்களை சிறைப் பிடித்துச் சென்றுள்ளதாகத் தகவல் கிடைத்துள்ளது.

மேலும் இந்த மீனவா்களையும், அவா்கள் பயன்படுத்திய மீன்பிடி படகையும் இலங்கை கடற்படை காவலில் எடுத்துச் சென்றுள்ளது. இதனால் இலங்கை அரசுடன் பேசி முன்னுரிமை அடிப்படையில் நடவடிக்கை எடுத்து மீனவா்களையும், அவா்களின் படகையும் விடுவிக்க உரிய நடவடிக்கை எடுக்க வேண்டும் என்று அக் கடிதத்தில் குறிப்பிட்டுள்ளாா் முதல்வா் ரங்கசாமி.

எதிா்க்கட்சித் தலைவா் ஆா். சிவா:

இலங்கை அரசு தொடா்ந்து மீனவா்களையும், படகுகளையும் பறிமுதல் செய்வதும், தமிழக முதல்வா் ஸ்டாலின் அழுத்தத்தால் மத்திய அரசு அவா்களை விடுவிக்க நடவடிக்கை எடுப்பதும் வாடிக்கையாக உள்ளது.

மீனவா்களை விடுவித்தாலும், படகுகளை விடுவிப்பதில்லை. இதனால் காரைக்கால் மாவட்ட மீனவ கிராமத்தைச் சோ்ந்த மீனவா்களின் குடும்ப வாழ்வாதாரம் பாதிக்கப்படுகிறது.

மத்திய, மாநில அரசுகள் இப் பிரச்னையில் உடனடியாகத் தலையிட்டு, கைது செய்யப்பட்ட மீனவா்களையும், படகுகளையும் விடுவிக்க நடவடிக்கை எடுக்க வேண்டும். தேவைப்பட்டால் இந்திய ராணுவத்தைப் பயன்படுத்த வேண்டும்.