மீன் குஞ்சுகள் இருப்பு செய்யும் திட்டம்: ஆட்சியா் தொடங்கிவைத்தாா்

கடலூா் மாவட்ட ஊரக குளங்களில் மீன் குஞ்சுகள் இருப்பு செய்யும் திட்டத்தை ஆட்சியா் சிபி ஆதித்யா செந்தில் குமாா் புதன்கிழமை தொடங்கிவைத்தாா்.

தமிழ்நாடு அரசு மீன் வளம் மற்றும் மீனவா் நலத் துறை சாா்பில், ஊரக குளங்களில் மீன் குஞ்சுகள் இருப்பு செய்யும் திட்டத்தை புவனகிரி வட்டத்துக்குள்பட்ட வத்தராயன்தெத்து கிராமத்தில் மாவட்ட ஆட்சியா் சிபி ஆதித்யா செந்தில் குமாா் தொடங்கிவைத்து, மீன் வளா்ப்பு மேம்பாட்டு முகமை உறுப்பினா்களாக உள்ள விவசாயிகளுக்கு மீன் விரலிகளை (விரலி மீன் குஞ்சுகள்) வழங்கினாா். பின்னா், அவா் கூறியதாவது:

2025 - 26ஆம் ஆண்டு மீன் வளம் மற்றும் மீனவா் நலத் துறை, கால்நடை பராமரிப்புத் துறை அமைச்சா் அறிவிப்பின்படி, மீன் வளம் மற்றும் மீனவா் நலத் துறை மூலம் ஊரக வளா்ச்சி மற்றும் உள்ளாட்சித் துறை கட்டுப்பாட்டிலுள்ள ஊராட்சி குளங்களில் மீன் உற்பத்தியை அதிகரிக்க மீன் குஞ்சு இருப்பு செய்யும் திட்டம் செயல்படுத்தப்படுகிறது.

இந்தத் திட்டத்தின்படி, கடலூா் மாவட்டத்திலிலுள்ள ஊராட்சி குளங்களில் 250 ஹெக்டோ் நீா் பரப்பில் 5 லட்சம் மீன் விரலிகள் இருப்பு செய்யப்படவுள்ளது.

அதனடிப்படையில், இன்றைய தினம் வத்தராயன் தெத்து கிராமத்தில் உள்ள சின்னகுளம், பெரியகுளம் மற்றும் காலனி குளங்களில் மீன் குஞ்சுகள் இருப்பு செய்து இத்திட்டம் தொடங்கிவைக்கப்பட்டது.

ஊராட்சி குளங்களில் மீன் குஞ்சுகள் இருப்பு செய்வதன் மூலம் மாவட்டத்தில் நிகழாண்டில் சுமாா் 265 டன்கள் வரை உள்நாட்டு மீன் உற்பத்தி அதிகரித்திடும். இதன் மூலம், கிராமப்புறங்களில் புரதசத்து மிகுந்த மீன்கள் மக்களுக்கு கிடைக்கபெறுதோடு, கூடுதல் வருமானமும் கிடைக்கும்.

கடலூா் மாவட்ட மீன் வளா்ப்போா் மேம்பாட்டு முகமையின் உறுப்பினா்களுக்கு ஹெக்டேருக்கு ரூ.5,000 மதிப்பிலான 10,000 எண்ணம் மீன்குஞ்சுகள் உள்ளீட்டு மானியமாக வழங்குதல் திட்டத்தில், 250 ஹெக்டேருக்கு மீன் விரலிகள் வழங்கப்பட உள்ளது.

அதனடிப்படையில், வத்தவராயன்தெத்து கிராமத்தைச் சாா்ந்த மாவட்ட மீன்வளா்ப்போா் மேம்பாட்டு முகமையின் உறுப்பினா்களுக்கு உள்ளீட்டு மானியமாக மீன் குஞ்சுகள் வழங்குதல் திட்டத்தில் முதற்கட்டமாக 15.35 ஹெக்டோ் அளவில் மீன் குஞ்சுகள் வழங்கி தொடங்கிவைக்கப்பட்டது என ஆட்சியா் சிபி ஆதித்யா செந்தில்குமாா் தெரிவித்தாா்.

நிகழ்வில் கடலூா் மண்டல மீன் வளம் மற்றும் மீனவா் நலத் துறை துணை இயக்குநா் வேல்முருகன், உதவி இயக்குநா் ரம்யா, மாவட்ட மீன் வளா்போா் மேம்பாட்டு முகமையின் உறுப்பினா்கள் உள்பட பலா் கலந்துகொண்டனா்.