திருப்பூா் மாவட்டம், முத்தம்பாளையம் ஊராட்சியில் மாவட்ட ஆட்சியா் மனீஷ் தலைமையில் கிராம சபைக் கூட்டம் நடைபெற்றது.
முத்தம்பாளையம் ஊராட்சியில் குருக்ககாடு கிராமம் பொது மைதான வளாகத்தில் சுதந்திர தின விழாவையொட்டி, வெள்ளிக்கிழமை நடைபெற்ற கிராம சபைக் கூட்டத்தில் சிறப்பு பாா்வையாளராக கலந்து கொண்ட மாவட்ட ஆட்சியா் மனீஷ் கூறியதாவது:
ஒவ்வொரு ஆண்டும் 6 முறை நடைபெறும் கிராம சபைக் கூட்டத்தின் நோக்கம் ஊராட்சியின் வளா்ச்சிக்கு திட்டமிடுதல் குறித்து பொதுமக்கள் முன்னிலையில் கருத்துருக்கள் பகிா்ந்து கொள்ளுதலே ஆகும். அதனடிப்படையில், ஒவ்வொரு முறையும் தங்கள் பகுதியில் நடைபெறும் கிராம சபைக் கூட்டத்தின்போது பொதுமக்கள் முழு அளவில் கலந்து கொண்டு ஊராட்சியின் வளா்ச்சிக்கு மேற்கொள்ளப்பட்ட பணிகள் குறித்தும் மேற்கொள்ள வேண்டிய பணிகள் குறித்தும் ஆலோசித்து செயல்படும்போது அந்த ஊராட்சியின் அடிப்படை வசதிகள் உள்பட அனைத்துப் பணிகளும் செயல்பட கிராம சபைக் கூட்டம் ஊன்றுகோலாக அமைகிறது.
மேலும், ஜல் ஜீவன் மிஷன் திட்டத்தின் கீழ் நடைபெற்று வரும் வீடுகளுக்கு குடிநீா் இணைப்புப் பணிகளை விரைவாக முடிக்க வேண்டும். வீடுதோறும் வழங்கப்படும் குடிநீா் தடையின்றி சுத்தமாக வழங்கிட அலுவலா்கள் உறுதி செய்திட வேண்டும். வடகிழக்குப் பருவமழை தொடங்கவுள்ளதால் தேவையான முன்னேற்பாட்டுப் பணிகளை தற்போதே தொடங்க வேண்டும். பொதுமக்கள் பயன்பெறும் வகையில் ‘நலம் காக்கும் ஸ்டாலின்’ திட்டம் தொடங்கப்பட்டு ஒவ்வொரு சனிக்கிழமையும்
மாவட்டங்களில் முகாம்கள் நடைபெற்று வருகின்றன. இதில் பல்வேறு வகை சிறப்பு மருத்துவ சேவைகள், புற்றுநோய் கண்டறியும் பரிசோதனைகள், ரத்தப் பரிசோதனை உள்ளிட்ட அனைத்துப் பரிசோதனைகளும் மேற்கொள்ளப்படுகின்றன.
மேலும், ‘உங்களுடன் ஸ்டாலின்’ திட்ட முகாம்கள் மாவட்டத்தில் மாநகராட்சி, நகராட்சி, பேரூராட்சி மற்றும் ஊராட்சிகளில் நடைபெற்று வருகிறது. இதில் பல்வேறு துறைகளைச் சாா்ந்த சேவைகள் பொதுமக்களுக்கு வழங்கப்படுகின்றன. எனவே இம்முகாம்களை பொதுமக்கள் பயன்படுத்திக் கொள்ள வேண்டும். அரசு
அளிக்கும் அனைத்து நலத்திட்டங்களையும் பொதுமக்கள் நல்ல முறையில் பயன்படுத்திக் கொண்டு பயன்பெற வேண்டுமென தெரிவித்தாா்.
பின்னா், வேளாண்மைத் துறை சாா்பில் தேசிய உணவுப் பாதுகாப்புத் திட்டம், அனைத்து கிராம ஒருங்கிணைந்த வேளாண் வளா்ச்சித் திட்டம், ஊட்டச்சத்து மேலாண்மை இயக்கம் ஆகிய திட்டங்களின் கீழ் சோளம் விதை, காய்கறி விதை தொகுப்புகள், தென்னைக்கன்றுகள், பழச்செடி தொகுப்புகளும், மகளிா் திட்டம் சாா்பில் முத்தம்பாளையம் ஊராட்சி அளவிலான 5 கூட்டமைப்புகளுக்கு ரூ.3.70 லட்சம் மதிப்பிலான கடனுதவிகளையும் பயனாளிகளுக்கு மாவட்ட ஆட்சியா் வழங்கி, பொதுமக்களிடமிருந்து கோரிக்கை மனுக்களையும் பெற்றுக் கொண்டாா்.
முன்னதாக ஆட்சிா் தலைமையில் ஹெச்ஐவி விழிப்புணா்வு உறுதிமொழி ஏற்றுக் கொள்ளப்பட்டது. அதனைத் தொடா்ந்து, திருப்பூா் மாவட்டம், ஊத்துக்குளி வட்டம், வெற்றி வேலாயுதசாமி கோயிலில் நடைபெற்ற பொதுவிருந்தில் மாவட்ட ஆட்சியா் கலந்து கொண்டாா்.
இந்நிகழ்ச்சியில், மாவட்ட ஊரக வளா்ச்சி முகமையின் திட்ட இயக்குநா் க.சங்கமித்திரை, வேளாண்மைத் துறை இணை இயக்குநா் சுந்தரவடிவேலு, ஊராட்சிகளின் உதவி இயக்குநா் அசோகன், வேளாண் பொறியியல் துறை செயற்பொறியாளா் கிருஷ்ணமூா்த்தி உள்ளிட்ட ஏராளமானோா் கலந்து கொண்டனா்.
