உடுமலையில் பட்டப் பகலில் வீட்டின் பூட்டை உடைத்து 17 பவுன், ரூ.2.80 லட்சம் ரொக்கம் திருட்டு

உடுமலையில் பட்டப் பகலில் வீட்டின் பூட்டை உடைத்து 17 பவுன் நகை, ரூ.2.80 லட்சம் ரொக்கம் திருடப்பட்டது.

திருப்பூா் மாவட்டம், உடுமலை நகரை ஒட்டியுள்ள வாஞ்சிநாதன் நகரைச் சோ்ந்தவா் நடராஜ். தனியாா் பள்ளியில் கிளொ்க்காக பணியாற்றி வருகிறாா். இவா் வியாழக்கிழமை பணிக்குச் சென்றுவிட்ட நிலையில் இவரது மனைவி பிரியா வீட்டைப் பூட்டி விட்டு தனது சகோதரியைப் பாா்க்க உடுமலையை அடுத்துள்ள கொங்கல்நகரம் கிராமத்துக்கு மதியம் சென்றுவிட்டாா்.

பின்னா், மாலையில் வீடு திரும்பியபோது வீட்டின் பூட்டு உடைக்கப்பட்டிருந்ததைப் பாா்த்து அதிா்ச்சி அடைந்தாா். இதைத் தொடா்ந்து வீட்டுக்குள் சென்று பாா்த்தபோது பீரோவில் இருந்த 17 பவுன் நகை, ரூ.2.80 லட்சம் ரொக்கம் ஆகியவற்றை மா்ம நபா்கள் திருடிச் சென்றது தெரியவந்தது.

இது குறித்து உடுமலை காவல் நிலையத்தில் பிரியா வெள்ளிக்கிழமை அளித்த புகாரின் பேரில் போலீஸாா் விசாரணை நடத்தி வருகின்றனா்.

பட்டப் பகலில் நடந்த இந்த துணிகர சம்பவத்தால் அந்தப் பகுதியில் பொதுமக்களிடையே அச்சம் ஏற்பட்டுள்ளது.