ரயில் விபத்து: காயமடைந்தவா்களுக்கு அரசியல் கட்சியினா் ஆறுதல்

கடலூா் செம்மங்குப்பம் அருகே செவ்வாய்க்கிழமை காலை பள்ளி வேன் மீது பயணிகள் ரயில் மோதிய விபத்தில் காயமடைந்து கடலூா் தலைமை மருத்துவமனையில் சிகிச்சை பெற்று வருபவா்களை சந்தித்து அதிமுக, தேமுதிக, கம்யூனிஸ்ட் உள்ளிட்ட அரசியல் கட்சிகளின் நிா்வாகிகள் ஆறுதல் கூறினா்.

காயமடைந்தவா்களை சந்தித்து, அதிமுக முன்னாள் அமைச்சா் எம்.சி.சம்பத் ஆறுதல் கூறினாா். பின்னா், அவா் செய்தியாளரிடம் கூறியதாவது: பாதிக்கப்பட்டவா்களுக்கு அதிமுக சாா்பில் ஆழந்த இரங்கலை தெரிவித்துக்கொள்கிறோம். மாவட்ட நிா்வாகம் மற்றும் காவல் துறை பள்ளி உரிமையாளா்கள், ஓட்டுநா்களை அழைத்து ஆலோசனை வழங்கி, விபத்துகளைத் தவிா்க்க நடவடிக்கை எடுக்க வேண்டும்.

விபத்தில் பாதிக்கப்பட்டவா்களுக்கு தலா ரூ.25 லட்சம் நிவாரணம் வழங்க வேண்டும். தெற்கு ரயில்வே நிா்வகம் ரயில்வே கேட்டுகளை ஆய்வு செய்து, ஒரு கேட்டுக்கு இரண்டு கேட் கீப்பா்களை நியமனம் செய்ய வேண்டும் என்றாா்.

இதேபோல, அதிமுக முன்னாள் எம்எல்ஏக்கள் சொரத்தூா் ரா.ராஜேந்திரன், சத்யா பன்னீா்செல்வம், தேமுதிக சாா்பில் முன்னாள் எம்எல்ஏ சிவக்கொழுந்து, விசிக சாா்பில் துரை.ரவிக்குமாா் எம்.பி., கடலூா் மாநகராட்சி துணை மேயா் பா.தாமரைச்செல்வன், மாா்க்சிஸ்ட் சாா்பில் மாவட்டச் செயலா் கோ.மாதவன் உள்ளிட்ட அரசியல் கட்சி நிா்வாகிகள் கடலூா் அரசு தலைமை மருத்துவமனையில் சிகிச்சை பெற்று வருபவா்களை சந்தித்து ஆறுதல் கூறினா்.

தமிழா்களை நியமிக்க வேண்டும் - தி.வேல்முருகன்: இதுகுறித்து தவாக தலைவா் தி.வேல்முருகன் வெளியிட்ட அறிக்கை: பள்ளி வேன் மீது ரயில் மோதி 3 மாணவா்கள் உயிரிழந்த சம்பவம் அதிா்ச்சியளிக்கிறது. விபத்துக்கு செம்மங்குப்பம் ரயில்வே கேட் மூடப்படாததும், கேட் கீப்பா் மெத்தனப்போக்குடன் செயல்பட்டதுமே காரணம் என காவல் துறை தரப்பில் தெரிவிக்கப்பட்டுள்ளது. கேட் கீப்பரை பணி நீக்கம் செய்து, கைது செய்ய வேண்டும்.

பெரும்பாலான ரயில்வே கேட்டுகளில் வட மாநிலத்தவா்கள் நியமிக்கப்பட்டுள்ளதால், மொழிப் பிரச்னை உள்ளிட்ட காரணங்களால் விபத்து ஏற்படுகிறது. எனவே, தமிழா்களை பணி நியமனம் செய்ய வேண்டும் எனத் தெரிவித்துள்ளாா்.

பாமக சாலை மறியல்: விபத்தில் காயமடைந்தவா்கள் அனுமதிக்கப்பட்டிருந்த கடலூா் அரசு தலைமை மருத்துவமனை எதிரே பாமக மாவட்டச் செயலா் சண்.முத்துகிருஷ்ணன் தலைமையில் அக்கட்சி நிா்வாகிகள் சுமாா் 15 போ் மறியலில் ஈடுபட்டனா்.

அப்போது, விபத்தில் காயமடைந்தவா்களுக்கு உயா் சிகிச்சை அளிக்க நடவடிக்கை எடுக்க வேண்டும். உயிரிழந்தவா்களுக்கு ரூ.ஒரு கோடி இழப்பீடு வழங்க வேண்டும் என வலியுறுத்தி முழக்கமிட்டனா்.

பின்னா், அவா்களிடம் கடலூா் எஸ்.பி. எஸ்.ஜெயக்குமாா் பேச்சு நடத்தியதைத் தொடா்ந்து, அவா்கள் சாலை மறியலைக் கைவிட்டனா்.

குடியிருப்போா் சங்கம் அஞ்சலி: உயிரிழந்த மாணவா்களுக்கு கடலூா் குடியிருப்போா் நலச் சங்க கூட்டமைப்பு சாா்பில், அதன் சிறப்புத் தலைவா் எம்.மருதவாணன் தலைமையில் நிா்வாகிகள் மெழுகுவா்த்தி ஏற்றி அஞ்சலி செலுத்தினா்.