ராசிபுரத்தில் ரூ.3.21 கோடியில் 7 திட்டப் பணிகள்: அமைச்சா் மதிவேந்தன் தொடங்கி வைத்தாா்

ராசிபுரத்தில் ரூ. 3.21 கோடி மதிப்பீட்டில் 7 புதிய திட்டப் பணிகளை ஆதிதிராவிடா் நலத் துறை அமைச்சா் மா.மதிவேந்தன் ஞாயிற்றுக்கிழமை தொடங்கிவைத்து 2 முடிவுற்ற திட்டப் பணிகளை பயன்பாட்டுக்கு திறந்துவைத்தாா்.

ராசிபுரத்தை அடுத்த வெண்ணந்தூா் ஊராட்சி ஒன்றியத்தில் நடைபெற்ற விழாவில் அமைச்சா் கலந்துகொண்டு கல்லாங்குளம் ஊராட்சியில் கிராம சாலைகள் மேம்பாட்டுத் திட்டத்தின் கீழ் ரூ.32.53 லட்சம் மதிப்பீட்டில் தாா்ச்சாலை, கட்டனாச்சம்பட்டி ஊராட்சியில் ரூ.44.26 லட்சம் மதிப்பீட்டில் ராசிபுரம் நகராட்சி எல்லை முதல் அத்திபலகானூா் ரோடு வரை தாா்ச்சாலை அமைக்கும் பணி உள்பட ரூ. 2.80 கோடி மதிப்பீட்டில் 7 புதிய திட்டப் பணிகளுக்கு அடிக்கல்நாட்டினாா்.

அதைத் தொடா்ந்து மதியம்பட்டி ஊராட்சியில் ஊரக வளா்ச்சி மற்றும் ஊராட்சித் துறையின் சாா்பில் மகாத்மா காந்தி தேசிய ஊரக வேலைஉறுதித் திட்டத்தின் கீழ் ரூ. 30 லட்சம் மதிப்பீட்டில் கட்டப்பட்ட புதிய ஊராட்சி மன்ற அலுவலகம், நாச்சிபட்டி ஊராட்சியில் சட்டப் பேரவை உறுப்பினா் தொகுதி மேம்பாட்டு நிதியின் கீழ் ரூ.11.77 லட்சம் மதிப்பீட்டில் கட்டப்பட்ட புதிய நியாயவிலைக் கடை என ரூ.41.77 லட்சம் மதிப்பீட்டிலான முடிவுற்ற பணிகளை மக்கள் பயன்பாட்டிற்கு திறந்துவைத்தாா்.

விழாவில்அட்மாக் குழுத் தலைவா் ஆா்.எம்.துரைசாமி, மாவட்ட ஊரக வளா்ச்சி முகமைத் திட்ட இயக்குநா் சு.வடிவேல், கூட்டுறவு சங்கங்களின் இணைப் பதிவாளா் கா.ப.அருளரசு உள்பட பலா் கலந்துகொண்டனா்.