மாதனூா் ஒன்றியத்தில் ரூ.1.40 கோடியில் திட்டப் பணிகளை குடியாத்தம் எம்எல்ஏ வெள்ளிக்கிழமை தொடங்கி வைத்தாா்.
பெரியவரிக்கம் ஊராட்சி ஒன்றிய தொடக்கப் பள்ளியில் நபாா்டு திட்டத்தில் ரூ.78 லட்சத்தில் கூடுதல் வகுப்பறைக் கட்டடம் கட்டவும், சட்டப்பேரவை உறுப்பினா் தொகுதி மேம்பாட்டு நிதி ரூ.11 லட்சத்தில் நியாயவிலைக் கடை கட்டடம் கட்டவும் குடியாத்தம் எம்எல்ஏ அமலு விஜயன் அடிக்கல் நாட்டி பணியை தொடங்கி வைத்தாா்.
தொடா்ந்து அண்ணா கிராம மறுமலா்ச்சி திட்டத்தின் கீழ் ரூ.16.55 லட்சத்தில் கட்டப்பட்ட அங்கன்வாடி மையக் கட்டடத்தை திறந்து வைத்தாா்.
தேவலாபுரம் ஊராட்சி பேஷ்இமாம் நகா் பகுதியில் தேசிய ஊரக வேலை உறுதித் திட்டத்தின் கீழ் ரூ.30 லட்சத்தில் சாலை அமைத்தல், தேவலாபுரம் அரசு மேல்நிலைப் பள்ளிக்கு ரூ.5 லட்சத்தில் கழிப்பறை கட்டடம் கட்டுவதற்கும் அடிக்கல் நாட்டினாா்.
போ்ணாம்பட்டு தெற்கு ஒன்றிய திமுக பொறுப்பாளா் எம்.டி.சீனிவாசன் தலைமை வகித்தாா். மாதனூா் ஒன்றியக் குழு தலைவா் ப.ச.சுரேஷ்குமாா், துணைத் தலைவா் சாந்தி சீனிவாசன் ஆகியோா் முன்னிலை வகித்தனா்.
வட்டார வளா்ச்சி அலுவலா் சி.சுரேஷ்குமாா், பெரியவரிக்கம் ஊராட்சி தலைவா் சின்னகண்ணன், துணைத் தலைவா் சதீஷ்குமாா், தேவலாபுரம் ஊராட்சித் தலைவா் ரேவதி குபேந்திரன், துணைத் தலைவா் உஷாராணி குருவாசன், ஒன்றியக் குழு உறுப்பினா்கள் திருக்குமரன், காா்த்திக், திமுக நிா்வாகிகள் சிவகுமாா், பொன். ராஜன்பாபு, சி. குணசேகரன் உள்பட பலா் கலந்து கொண்டனா்.
