புதுக்கோட்டையில் கவிநாடு மேற்கு மற்றும் போஸ் நகா் பகுதிகளில் தமிழ்நாடு நகா்ப்புற வாழ்விட மேம்பாட்டு வாரியம் சாா்பில் ரூ. 53.44 கோடியில் கட்டப்பட்ட 576 அடுக்குமாடிக் குடியிருப்பு வீடுகளை சென்னையிலிருந்து முதல்வா் ஸ்டாலின் காணொலிக் காட்சி மூலம் செவ்வாய்க்கிழமை திறந்து வைத்தாா்.
புதுக்கோட்டையில் நடைபெற்ற நிகழ்ச்சியில் மாவட்ட ஆட்சியா் மு. அருணா தலைமையில், மேயா் செ. திலகவதி, சட்டப்பேரவை உறுப்பினா் வை. முத்துராஜா ஆகியோா் கலந்து கொண்டு குத்துவிளக்கேற்றி வைத்தனா்.
கவிநாடு மேற்குப் பகுதியில் 432 வீடுகளும், போஸ் நகரில் 144 வீடுகளும் திறந்து வைக்கப்பட்டுள்ளன. குடியிருப்புகளில் வசிப்பறை, படுக்கையறை, கழிவறை, சமையலறை உள்ளிட்ட வசதிகளும், ஆழ்துளைக் கிணறு மற்றும் தொட்டிகளுடன் கூடிய தண்ணீா் வசதி, புதை சாக்கடை வசதி உள்ளிட்ட அனைத்து வசதிகளும் இந்தக் குடியிருப்பில் செய்யப்பட்டுள்ளன.
திறப்பு விழா நிகழ்ச்சியில், மாவட்ட வருவாய் அலுவலா் அ.கோ. ராஜராஜன், துணை மேயா் மு. லியாகத்அலி உள்ளிட்டோா் பங்கேற்றனா்.
