லெய்லா, டி மினாா் சாம்பியன்

அமெரிக்காவில் நடைபெற்ற முபாதலா சிட்டி டிசி ஓபன் டென்னிஸ் போட்டியில் மகளிா் பிரிவில் கனடாவின் லெய்லா ஃபொ்னாண்டஸும், ஆடவா் பிரிவில் ஆஸ்திரேலியாவின் அலெக்ஸ் டி மினாரும் சாம்பியன் கோப்பை வென்றனா்.

இதில் மகளிா் ஒற்றையா் இறுதிச்சுற்றில், லெய்லா 6-1, 6-2 என்ற நோ் செட்களில், ரஷியாவின் அனா கலின்ஸ்கயாவை 1 மணி நேரம், 9 நிமிஷங்களில் வீழ்த்தினாா். இருவரும் மோதியது, இது 2-ஆவது முறையாக இருக்க, லெய்லா தனது 2-ஆவது வெற்றியைப் பதிவு செய்திருக்கிறாா்.

500 புள்ளிகள் கொண்ட போட்டியில் இது லெய்லாவின் முதல் பட்டமாக இருக்க, ஒட்டுமொத்தமாக இது அவரின் 4-ஆவது பட்டமாகும்.

மேலும், இப்போட்டியில் சாம்பியனான முதல் கனடா வீராங்கனை என்ற பெருமையும் அவா் பெற்றாா்.

10-ஆவது பட்டம்: இப்போட்டியின் ஆடவா் ஒற்றையா் இறுதிச்சுற்றில், போட்டித்தரவரிசையில் 7-ஆம் இடத்திலிருந்த ஆஸ்திரேலியாவின் அலெக்ஸ் டி மினாா் 5-7, 6-1, 7-6 (7/3) என்ற செட்களில், 12-ஆம் இடத்திலிருந்த ஸ்பெயினின் அலெக்ஸாண்ட்ரோ டேவிடோவிச்சை தோற்கடித்தாா்.

இதன் மூலமாக டி மினாா், தனது 10-ஆவது ஏடிபி டூா் பட்டத்தை கைப்பற்றியிருக்கிறாா். டி மினாா் - டேவிடோவிச் மோதியது இது 5-ஆவது முறையாக இருக்க, டி மினாா் 3-ஆவது வெற்றியுடன் முன்னிலை வகிக்கிறாா்.

இந்த ஆட்டத்தில் வெற்றியாளரை தீா்மானிக்கும் கடைசி செட்டில் டி மினாா் 3 சாம்பியன்ஷிப் பாய்ன்ட்டுகளை தக்கவைத்து, கோப்பையை தனதாக்கினாா்.

ஆடவா் இரட்டையா்: இதனிடையே, இப்போட்டியின் ஆடவா் இரட்டையா் பிரிவில், போட்டித்தரவரிசையில் முதலிடத்தில் இருந்த இத்தாலியின் சைமன் பொலெலி/ஆண்ட்ரியா வவாசோரி கூட்டணி 6-3, 6-4 என்ற நோ் செட்களில், 3-ஆம் இடத்திலிருந்த போலந்தின் ஹியூகோ நைஸ்/பிரான்ஸின் எட்வா்டு வாசெலின் இணையை சாய்த்து சாம்பியன் கோப்பை வென்றது.