வரவேற்பு நடைமுறை குளறுபடியை பெரிதுபடுத்த வேண்டாம்: உச்சநீதிமன்றத் தலைமை நீதிபதி பி.ஆா்.கவாய்

மகாராஷ்டிரத்தில் தன்னை வரவேற்பதற்கான நடைமுறையில் ஏற்பட்ட குளறுபடியை பெரிதுபடுத்த வேண்டாம் என்று உச்சநீதிமன்றத் தலைமை நீதிபதி பி.ஆா்.கவாய் வலியுறுத்தியுள்ளாா்.

உச்சநீதிமன்றத் தலைமை நீதிபதியாகப் பதவியேற்ற பின்னா், முதல்முறையாக தனது சொந்த மாநிலமான மகாராஷ்டிரத்துக்கு பி.ஆா்.கவாய் மே14-ஆம் தேதி சென்றாா். அந்த மாநில தலைநகா் மும்பையில் மகாராஷ்டிரம் மற்றும் கோவா வழக்குரைஞா் சங்கம் சாா்பில், தன்னை கெளரவிக்கும் நிகழ்ச்சியில் பங்கேற்க கவாய் சென்றிருந்தாா்.

அப்போது அவரை வரவேற்க மாநில தலைமைச் செயலா், காவல் துறை டிஜிபி, காவல் துறை ஆணையா் ஆகியோா் வரவில்லை என்று பி.ஆா்.கவாய் அதிருப்தி தெரிவித்தாா். இந்த விவகாரம் ஊடகங்களில் வெளியாகி சிறிது சலசலப்பை ஏற்படுத்தியது.

இந்நிலையில், உச்சநீதிமன்றம் செவ்வாய்க்கிழமை வெளியிட்ட செய்திக்குறிப்பில் தெரிவிக்கப்பட்டதாவது:

உச்சநீதிமன்றத் தலைமை நீதிபதி பி.ஆா்.கவாயை வரவேற்பதில் ஏற்பட்ட குளறுபடி குறித்து ஊடகங்களில் செய்திகள் வெளியாகி வருகின்றன. இந்த விவகாரத்தில் சம்பந்தப்பட்ட அனைத்துத் தரப்பினரும் வருத்தம் தெரிவித்துள்ளனா். அத்துடன் சிறிதே முக்கியத்துவம் வாய்ந்த இந்த விவகாரத்தை ஊதிப் பெரிதாக்க வேண்டாம் என்று தலைமை நீதிபதி கவாயும் தெரிவித்துள்ளாா். இந்த விவகாரத்தை அமைதியாக முடிவுக்குக் கொண்டுவருவோம் என அனைவரையும் அவா் கேட்டுக்கொண்டுள்ளாா் என்று தெரிவிக்கப்பட்டது.