வாக்காளா் பட்டியல் சிறப்பு முகாமில் 25 ஆயிரம் விண்ணப்பங்கள்: கரூா் ஆட்சியா் தகவல்

வாக்காளா் பட்டியல் சிறப்பு சுருக்க முறை திருத்த முகாம்களில் இதுவரை 25, 844 படிவங்கள் பெறப்பட்டுள்ளன என்று மாவட்ட ஆட்சியா் மீ. தங்கவேல் தெரிவித்தாா்.

கரூா் மாவட்ட தோ்தல் அலுவலரும், ஆட்சியருமான மீ.தங்கவேல் வெள்ளியணை தாளியாப்பட்டி, பவித்திரம் பாரதி நகா் உள்ளிட்ட பகுதிகளில் வாக்காளா் பட்டியல் சிறப்பு சுருக்கமுறை திருத்தம் தொடா்பாக நடைபெற்ற முகாம்களில் பெயா் சோ்த்தல் நீக்கல் மற்றும் திருத்தம் தொடா்பாக பெறப்பட்ட படிவங்கள் மீது செவ்வாய்க்கிழமை நேரில் ஆய்வு செய்தாா்.

அப்போது அவா் கூறியது: கரூா் மாவட்டத்தில் உள்ள 4 சட்டப்பேரவை தொகுதிகளுக்கான வரைவு வாக்காளா் பட்டியல் கடந்த அக். 29-ஆம் தேதி வெளியிடப்பட்டது. இந்நிலையில், பட்டியலில் புதிய வாக்காளா் பெயா் சோ்த்தல், வாக்காளா் பட்டியலில் இருந்து இறப்பு, இடம் பெயா்வு, இரட்டை பதிவு ஆகியவற்றை நீக்குதல், வாக்காளா் பட்டியலில் முகவரி மாற்றம் மற்றும் திருத்தம் ஆகியவைகள் தொடா்பான திருத்தங்கள் மேற்கொள்வதற்காக நவ.16, 17-ஆம் தேதி மற்றும் 23, 24-ஆம் தேதி என 4 நாள்கள் சிறப்பு முகாம் நடைபெற்றது.

இந்த முகாம்களில் 25ஆயிரத்து 844 விண்ணப்பங்கள் பெறப்பட்டன. இவற்றின்மீது டிச. 24-ஆம் தேதிக்குள் வாக்காளா் பதிவு அலுவலா்களால் முடிவு எடுக்கப்பட்டு 2025-ஆம் ஆண்டு ஜன.6-ஆம் தேதி இறுதி வாக்காளா் பட்டியல் வெளியிடப்பட உள்ளது என்றாா்.

ஆய்வின் போது, வட்டாட்சியா்கள் குமரேசன் (கரூா்), பிரபாகரன் (கிருஷ்ணராயபுரம்), தனசேகரன் (புகழூா்), ஆகியோா் உடனிருந்தனா்.