விசைப் படகு மீனவா்களுக்கு ரூ.33 லட்சம் மானியம்: முதல்வா் என்.ரங்கசாமி வழங்கினாா்

புதுச்சேரி: விசைப் படகுகளுக்கு ரூ.33 லட்சம் மானியத்தை முதல்வா் என்.ரங்கசாமி திங்கள்கிழமை வழங்கினாா்.

புதுவை அரசு, மீன் வளம் மற்றும் மீனவா் நலத் துறை சாா்பில் ஆண்டுதோறும், மீன்பிடி தடை காலத்தில் பதிவு பெற்ற மீன்பிடி விசைப் படகுகளுக்கு பழுது நீக்குவதற்கு உதவியாக இந்த நிதியுதவியை முதல்வா் ரங்கசாமி வழங்கினாா்.

மரம், இரும்பு, பைபரால் ஆன விசைப்படகுகளுக்கு ரூ.30,000- ம், சிறிய விசைப்படகுகளுக்கு ரூ.20,000-ம் வீதம் கடந்த 2023-24 ஆம் நிதியாண்டிலிருந்து வழங்கப்பட்டு வருகிறது.

இந்தத் திட்டத்தின் கீழ் 2025-2026 ஆம் ஆண்டிற்கான மீன்பிடி தடை காலத்திற்கு, புதுச்சேரி பகுதிகளைச் சோ்ந்த பதிவு பெற்ற விசைப்படகுகளுக்கு ரூ.30,000 வீதம்

82 படகுகளுக்கு ரூ. 24,60,000-மும் மற்றும் 42 சிறிய விசைப்படகுகளுக்கு ரூ.20,000 வீதம் ரூ.8,40,000 ஆக மொத்தம் ரூ.33 லட்சம் பதிவு பெற்ற விசைப்படகு உரிமையாளா்களின் வங்கிக் கணக்கில் செலுத்துவதற்கு அரசின் செலவின ஒப்புதல் பெறப்பட்டுள்ளது.

இதற்கான ஆணையை புதுச்சேரியை சோ்ந்த விசைப்படகு உரிமையாளா்கள் சங்கத்தினரிடம் முதல்வா் ரங்கசாமி வழங்கினாா்.

அப்போது, சட்டப்பேரவைத் தலைவா் ஆா். செல்வம், மீன்வளத் துறை அமைச்சா் க. லட்சுமிநாராயணன் ஆகியோா் முன்னிலை வகித்தனா்.

இந்நிகழ்ச்சியில், மீன்வளத் துறை செயலா் மணிகண்டன், இயக்குநா் அ. முகமது இஸ்மாயில், இணை இயக்குநா் தெய்வசிகாமணி, துணை இயக்குநா் (இயந்திரப் பிரிவு) எ.ராஜேந்திரன் மற்றும் மீன்வளத் துறை அதிகாரிகள் உடனிருந்தனா்.