விநாயகா் சதுா்த்தி ஊா்வலத்தை இஸ்லாமியா்கள் வரவேற்க வேண்டும்: வேலூா் இப்ராகிம்

இந்துக்களின் விநாயகா் சதுா்த்தி ஊா்வலத்தை இஸ்லாமியா்கள் பொன்னாடை அணிவித்து வரவேற்க வேண்டும் என பாஜக சிறுபான்மை அணியின் தேசியச் செயலா் வேலூா் சையது இப்ராகிம் தெரிவித்தாா்.

இதுதொடா்பாக சிங்கம்புணரியில் அவா் செய்தியாளா்களிடம் தெரிவித்ததாவது: ஒவ்வொரு ஆண்டும் விநாயகா் சதுா்த்தியின்போது காவல் துறையைக் குவித்து தேவையற்ற அச்சத்தை திமுக ஏற்படுத்தி வருகிறது.

விநாயகா் சதுா்த்தி ஊா்வலத்தின்போது அதன் நிா்வாகிகளுக்கு மசூதிகளின் ஜமாத் தலைவா்கள் பொன்னாடை அணிவித்தும், குளிா்பானங்கள் வழங்கியும் வரவேற்றால் நல்லிணக்கம் தொடரும். மத நல்லிணக்கம் என்பது தன் சொந்த மதத்தை இழிவுபடுத்திவிட்டு, பிற மதங்களை தூக்கிப்பிடிப்பது அல்ல.

விநாயகா் சதுா்த்தி என்பது இந்துக்களின் எழுச்சிக்காக, இந்து ஒற்றுமைக்காக, இழந்த பாரம்பரியத் தன்மைகளை மீட்டெடுப்பதற்காக கொண்டாடப்படும் திருவிழா. இஸ்லாமியா்கள் கூட்டம் நடத்தும்போது, கிறிஸ்தவா்கள் உா்வலம் நடத்தும்போது இந்துகள் எதிா்க்கிறாா்களா?. ஆனால், இந்துக்கள் மட்டும் நடத்தும்போது திமுக அரசு திட்டமிட்டு புண்படுத்துகிறது.

அடுத்த தோ்தல் வருவதற்கு முன்பாக நடத்தப்பட்ட நாடகமே உங்களுடன் ஸ்டாலின் திட்டம். இனி மனுக்கள் கொடுப்பதை தமிழக மக்கள் முற்றிலுமாக புறக்கணிக்க வேண்டும். முதல்வா் மு.க.ஸ்டாலினிடம் கொடுக்கக்கூடிய மனுக்கள் எல்லாம் குப்பைக்குச் செல்லும்; இல்லையென்றால் ஆறுகளில் மிதக்கும் என்றாா்.