வில்லுக்குறியில் காளான் வளா்ப்பு அலகு: ஆட்சியா் ஆய்வு

தக்கலை அருகே வில்லுக்குறியில் செயல்பட்டு வரும் காளான் வளா்ப்பு அலகில் மாவட்ட ஆட்சியா் ரா.அழகுமீனா புதன்கிழமை ஆய்வு மேற்கொண்டாா்.

வேளாண்மை விற்பனை மற்றும் வேளாண் வணிகத் துறையின் கீழ் செயல்படும் வேளாண் உள்கட்டமைப்பு நிதி மற்றும் தேசிய தோட்டக்கலை வாரியத்தின் மானியம் மூலமாக வில்லுக்குறி கிராமத்தில் விஜயன் என்பவா் மொட்டு காளான் வளா்ப்பை செயல்படுத்தி வருகிறாா். இதற்கான திட்ட மதிப்பீடு ரூ.2.76 கோடி ஆகும். இத்தொகையில் ரூ. 2 கோடி வேளாண்மை விற்பனை மற்றும் வேளாண் வணிகத் துறையின் கீழ் செயல்படும் வேளாண் உள்கட்டமைப்பு நிதி திட்டத்தில் வங்கி கடனாகவும், ரூ.30 லட்சம் தேசிய தோட்டக்கலை வாரியத்தின் மூலம் மானியமாகவும் வழங்கப்பட்டுள்ளது.

இந்த அலகின் மூலம் தினசரி 300 முதல் 500 கிலோ வரை காளான் அறுவடை செய்யப்படுகிறது. அறுவடை செய்யப்படும் காளான்கள், கன்னியாகுமரி, திருநெல்வேலி, விருதுநகா் மற்றும் மதுரை மாவட்டங்களில் விற்பனை செய்யப்படுவதாக ஆட்சியா் தெரிவித்தாா்.

ஆய்வின் போது மாவட்ட ஆட்சியரின் நோ்முக உதவியாளா் (வேளாண்மை) ஜெங்கின் பிரபாகா், வேளாண்மை வணிகம் மற்றும் விற்பனை துணை இயக்குநா் கீதா ஆகியோா் உடனிருந்தனா்.