வெளிநாடுகளின் பெயரில் போலி நோய் எதிர்ப்பு மருந்துகள்: மத்திய சுகாதார அமைச்சகம் எச்சரிக்கை

நமது சிறப்பு நிருபர்

வெளிநாடுகளில் தயாரிக்கப்பட்ட மருந்துகள் என பெயர் பொறிக்கப்பட்ட மருந்துகளிடம் பொதுமக்கள் எச்சரிக்கையாக இருக்கும்படி மத்திய சுகாதாரம், குடும்ப நலத் துறை அமைச்சகம் செவ்வாய்க்கிழமை கேட்டுக் கொண்டுள்ளது.

இது குறித்து மத்திய சுகாதாரம், குடும்ப நலத் துறை அமைச்சகம் கூறியிருப்பது வருமாறு: போலி மருந்துகள் குறித்து வந்த தகவலின் அடிப்படையில் அவற்றுக்கு எதிராக மத்திய சுகாதார அமைச்சகம் நாடு முழுவதும் நடவடிக்கை எடுத்து வருகிறது. சமீபத்தில் போலி மருந்துகளின் சட்டவிரோத வணிகத்திற்கு எதிராக மத்திய சுகாதாரம், குடும்ப நலத் துறையின்கீழ் உள்ள மத்திய மருந்து தரக் கட்டுப்பாட்டு அமைப்பும் (சிடிஎஸ்சிஓ), மேற்குவங்கத்தில் உள்ள கிழக்கு மண்டல மருந்துக் கட்டுப்பாட்டு இயக்குநரகமும் கூட்டு நடவடிக்கைகளை மேற்கொண்டு மொத்த மருந்து வணிக நிறுவனங்களில் சோதனை நடத்தப்பட்டது.

இதில் கொல்கத்தாவில் உள்ள ஒரு நிறுவனத்தில் போலி மருந்துகள் இருந்தது கண்டுபிடிக்கப்பட்டு பறிமுதல் செய்யப்பட்டன. இதன் மொத்தச் சந்தை மதிப்பு சுமார் ரூ. 6.60 கோடி. முறையான விசாரணையை உறுதி செய்வதற்காக, மருந்துகளின் மாதிரிகள் தர பரிசோதனைக்கு அனுப்பப்பட்டுள்ளன. விரிவான விசாரணை மேற்கொள்ளப்பட்டு மொத்த விற்பனை நிறுவனத்தின் பெண் உரிமையாளர், கிழக்கு மண்டலத்தின் சிடிஎஸ்சிஓ}வின் மருந்து ஆய்வாளரால் கைது செய்யப்பட்டார்.

குற்றஞ்சாட்டப்பட்டவர் நீதிமன்றத்தில் ஆஜர்படுத்தப்பட்டு நீதிமன்றக் காவலில் வைக்கப்பட்டார். அவரிடம் மேலும் விசாரணை மேற்கொள்ள நீதிமன்றம் உத்தரவிட்டுள்ளது. கொல்கத்தா உள்ளிட்ட பல்வேறு இடங்களில் பல வெற்று (காலி மருந்து) பேக்கிங் பொருள்களையும் விசாரணைக் குழு கண்டுபிடித்தது. கைப்பற்றப்பட்ட பொருள்களின் நம்பகத்தன்மை குறித்து விசாரணை நடைபெற்று வருகிறது.

மேலும், தொடர்ச்சியாக மத்திய மருந்து தரக் கட்டுப்பாட்டு அமைப்பு போலி மருந்துகளின் சட்டவிரோத வணிகத்திற்கு எதிரான தீவிரமான நடவடிக்கைகளை மேற்கொண்டு வருகிறது. இது வரை நடத்தப்பட்ட சோதனைகளில் புற்றுநோய் எதிர்ப்பு, நீரிழிவு எதிர்ப்பு, பிற போலி மருந்துகள் என சந்தேகிக்கப்படும் ஏராளமான மருந்துகள் கைப்பற்றப்பட்டுள்ளன.

இந்த மருந்துகள் அயர்லாந்து, துருக்கி, அமெரிக்கா, வங்கதேசம் உள்ளிட்ட பல்வேறு நாடுகளில் தயாரிக்கப்பட்ட மருந்துகள் எனப் பெயர் பொறிக்கப்பட்டுள்ளது. இவை இந்தியாவில் சட்டபூர்வமாக இறக்குமதி செய்யப்பட்டதை நிரூபிக்கும் எந்த ஆதாரமும் இல்லை. இத்தகைய வெளிநாட்டு பெயர் பொறிக்கப்பட்ட மருந்துகளுக்கு ஆவணங்கள் இல்லாத நிலையில், இந்த மருந்துகள் போலியானவை என்றே கருதப்படுகிறது. இதனால், இத்தகைய மருந்துகளிடம் பொதுமக்கள் எச்சரிக்கையாக இருக்கும்படி கேட்டுக்கொள்ளப்படுகிறது.

தற்போது கைப்பற்றப்பட்ட மருந்துகள் சிடிஎஸ்சிஓ}வின் பாதுகாப்பில் வைக்கப்பட்டுள்ளன. சுகாதாரம், குடும்ப நல அமைச்சகம், பொதுமக்களின் பாதுகாப்பு மற்றும் நல்வாழ்வை உறுதி செய்வதில் இந்த நடவடிக்கை பொறுப்புடைமையுடன் மேற்கொள்ளப்பட்டு வருகிறது என மத்திய சுகாதாரத் துறை அமைச்சகம் தெரிவித்துள்ளது.