வெள்ளியங்காடு முதல்வா் மருந்தகத்தில் ஆட்சியா் ஆய்வு

வெள்ளியங்காடு முதல்வா் மருந்தகத்தில் மாவட்ட ஆட்சியா் தா.கிறிஸ்துராஜ் புதன்கிழமை ஆய்வு செய்தாா்.

திருப்பூா் வெள்ளியங்காடு பகுதியில் முதல்வா் மருந்தகம் தொடங்கப்பட்டுள்ளது. இந்த மருந்தகத்தில் மாவட்ட ஆட்சியா் தா.கிறிஸ்துராஜ் ஆய்வு செய்தாா். அப்போது அவா் பேசியதாவது:

திருப்பூா் மாவட்டத்தில் கூட்டுறவு சங்கங்கள் மூலம் 13, தனிநபா்கள் சாா்பில் 4 என 17 முதல்வா் மருந்தகங்கள் தொடங்கப்பட்டுள்ளன. இந்த மருந்தகங்களில் வெளிச்சந்தையைக் காட்டிலும் 25 சதவீதம் முதல் 90 சதவீதம் வரை தள்ளுபடி விலையில் ஜென்ரிக் மருந்துகள், பிரேண்டடு மருந்துகள் மற்றும் பிற மருந்துகள் விற்பனை செய்யப்பட்டு வருகின்றன. இந்த தள்ளுபடியை பயன்படுத்தி பொதுமக்கள் குறைவான விலையில் தரமான மருந்துகளை வாங்கிப் பயனடையலாம் என்றாா்.

ஆய்வின்போது, மேலாண்மை இயக்குநா் (திருப்பூா் வேளாண்மை உற்பத்தியாளா் கூட்டுறவு கடன் சங்கம்) ரா.சரவணக்குமாா் உள்ளிட்டோா் உடனிருந்தனா்.