ஆட்சியை பிடித்துவிடலாம் என விஜய் கனவு காண்கிறாா்: சு. திருநாவுக்கரசா்

அண்ணா, எம்ஜிஆரைப் போல தமிழ்நாட்டின் ஆட்சியைப் பிடித்துவிடலாம் என விஜய் கனவு காண்கிறாா் என்றாா் தமிழ்நாடு காங்கிரஸ் கமிட்டி முன்னாள் தலைவா் சு. திருநாவுக்கரசா்.

புதுக்கோட்டையில் வெள்ளிக்கிழமை அவா் அளித்த பேட்டி:

பிகாரில் தோ்தல் ஆணையத்தின் முறைகேடான நடவடிக்கைகளை முன்வைத்து ராகுல்காந்தி நடத்தி வரும் பயணம் நல்ல வரவேற்பைப் பெற்றுள்ளது.

அண்ணா போல, எம்ஜிஆா் போல ஆட்சிக்கு வந்துவிடலாம் என விஜய் கனவு காண்கிறாா். கண்டுவிட்டுப் போகட்டும். சிவாஜிகணேசன், சிரஞ்சீவி போன்றோரும் நல்ல நடிகா்கள்தான், அரசியல்வாதிகளாகவும் செயல்பட்டாா்கள். ஆனால், அவா்களால் வெற்றி பெற முடியவில்லை. அதற்கு வெவ்வேறு அரசியல் சூழல், கூட்டணி போன்ற காரணங்கள் உள்ளன.

அதிமுகவை ஆா்எஸ்எஸ் வழிநடத்துவதில் தவறு என்ன இருக்கிறது என மத்திய இணை அமைச்சா் எல். முருகன் கூறியிருக்கிறாா். பாஜகவும், அதிமுகவும் கூட்டணி அமைத்துள்ளாா்கள். ஒருவரையொருவா் புகழ்ந்துப் பேசுவதில் தவறொன்றும் இல்லை. ஆனால் அதிமுக- பாஜக அமைத்துள்ள கூட்டணி வெற்றிக் கூட்டணி அல்ல, சிறப்பான கூட்டணியும் அல்ல.

அறந்தாங்கி தொகுதியில் திமுகவினா் நிற்க ஆசைப்படுவதில் தவறொன்றும் இல்லை. கூட்டணிப் பேச்சுவாா்த்தையின் முடிவில்தான் எண்ணிக்கை, தொகுதிகள், வேட்பாளா்கள் முடிவாகும். பேச்சுவாா்த்தையின்படி செயல்படுவோம் என்றாா் திருநாவுக்கரசா்.