போலி நிறுவனம் தொடங்கி ரூ.206 கோடி மோசடி செய்ததாக ஒடிசாவைச் சோ்ந்த 2 பேரை புதுவை இணையவழி போலீஸாா் கைது செய்தனா்.
புதுச்சேரியைச் சோ்ந்த மகேஷ்குமாா் என்பவரை ஏமாற்றிய வழக்கில் மும்பையைச் சோ்ந்த சிவப்பா லக்ஷ்மண் பானே (62), உதயபான் நான போபடே (56) ஆகியோரை குஜராத்தில் கடந்த 20 நாள்களுக்கு முன் போலீஸாா் கைது செய்தனா். அவா்களிடம் நடத்தப்பட்ட விசாரணையில் இந்த மோசடி கும்பலுக்கு மூளையாக செயல்பட்டது ஒடிசாவை சோ்ந்த
கண்குசரண் சிபரம் பணிகராகி (36), அபிஷேக் என்கிற ஜகத் நாயக் (37) என்பதும், அவா்கள் இருவரும் துபாய் சுற்றுலா சென்றிருப்பதும் தெரியவந்தது.
இதையடுத்து, அவா்கள் வெளிநாடு தப்பி செல்லாமல் இருப்பதற்காக உடனடியாக மத்திய குடியேற்ற துறைக்கு கண்காணிப்பு நோட்டீஸ் அனுப்பப்பட்டது. இந்நிலையில், சுற்றுலா முடிந்து கடந்த 24-ம் தேதி மும்பை விமான நிலையத்துக்கு வந்த இருவரையும், குடியேற்ற துறை அதிகாரிகள் பிடித்து, புதுச்சேரி இணையவழி தனிப்படையிடம் ஒப்படைத்தனா்.
அதன்பிறகு இருவரையும் கடந்த 25-ம் தேதி புதுச்சேரி அழைத்து வந்த போலீஸாா் விசாரித்தனா். அதில் பல்வேறு பெயா்களில் 35 போலி நிறுவனங்களை உருவாக்கி, அதில் வங்கி கணக்கை இணைத்து மோசடி செய்து பணத்தை எடுத்துள்ளது தெரியவந்தது.
மேலும், இவா்கள் மீது இந்தியா முழுதும் 1,592 ஆன்லைன் மோசடி வழக்குகள் பதிவு செய்யப்பட்டுள்ளதும், இதுவரை ரூ.206 கோடிக்கு மேல் பொதுமக்களின் பணத்தை மோசடி செய்துள்ளதும், 23 மாநில போலீஸாா் இவா்களைத் தேடி வருவதும் தெரியவந்துள்ளது.
இந்த கும்பல் 3 மாதத்துக்கு ஒரு முறை புதிதாக நிறுவனத்தைத் தொடங்கி, அதன் மூலம் ஜி.எஸ்.டி, வங்கி கணக்கு உருவாக்கி பொது மக்களிடம் இருந்து மோசடியாக பணத்தைப் பெற்றுக் கொண்டு, அங்கிருந்து தப்பி செல்வதும், மீண்டும் அந்த நிறுவனத்தின் வங்கி கணக்கு, சிம்காா்டுகளைப் பயன்படுத்துவது இல்லை என்பதும் தெரியவந்துள்ளது என்று போலீஸாா் தெரிவித்தனா்.
கைது செய்யப்பட்ட இருவரிடம் இருந்தும் ரூ.4 லட்சத்து 68 ஆயிரம் ரொக்கம் மற்றும் மோசடிக்குப் பயன்படுத்திய செல்போன்கள், சிம்காா்டுகள், வங்கி புத்தகங்கள் பறிமுதல் செய்யப்பட்டுள்ளன. இருவரையும் சனிக்கிழமை காலாப்பட்டு மத்திய சிறையில் போலீஸாா் அடைத்தனா்.
இவ்வழக்கில் தொடா்புடைய சிலரை தேடி வருகின்றனா். சிறப்பாக செயல்பட்டு மோசடி நபா்களை கைது செய்த போலீஸாரை முதுநிலை காவல் கண்காணிப்பாளா் நித்யா ராதாகிருஷ்ணன் சனிக்கிழமை பாராட்டினாா்.
