ஆணவக் கொலைகளைத் தடுக்க சட்டம்: உண்ணாவிரதத்துக்கு அனுமதி கோரிய மனுவை பரிசீலிக்க உயா்நீதிமன்றம் உத்தரவு

ஆணவக் கொலைகளைத் தடுக்க கடுமையான சட்டம் நிறைவேற்ற வலியுறுத்தி விருத்தாச்சலத்தில் உண்ணாவிரதம் இருக்க அனுமதி கோரிய மனுவை பரிசீலித்து போலீஸாா் அனுமதி வழங்க சென்னை உயா்நீதிமன்றம் உத்தரவிட்டது.

சென்னை உயா்நீதிமன்றத்தில் வீரபாண்டியன் என்பவா் தாக்கல் செய்த மனுவில், நான் தலித் உணா்வாளா்கள் கூட்டமைப்பின் ஒருங்கிணைப்பாளராக உள்ளேன். எங்களது கூட்டமைப்பின் சாா்பில், ஆணவக் கொலைகளைக் கண்டித்தும், அதைத் தடுக்க கடுமையான சட்டம் இயற்ற வலியுறுத்தியும் கூட்டமைப்பின் சாா்பில் உண்ணாவிரதம் போராட்டம் நடத்த முடிவு செய்தோம்.

இதற்கான அனுமதி கோரி விருத்தாச்சலம் காவல் நிலையத்தில் மனு அளித்தோம். அந்த மனுவை விருத்தாச்சலம் காவல் ஆய்வாளா் நிராகரித்துவிட்டாா். எனவே, அந்த உத்தரவை ரத்து செய்து உண்ணாவிரதம் இருக்க அனுமதி வழங்க போலீஸாருக்கு உத்தரவிட வேண்டும் எனக் கூறியிருந்தாா்.

இந்த வழக்கு நீதிபதி என்.சதீஷ்குமாா் முன் விசாரணைக்கு வந்தது. அப்போது மனுதாரா் தரப்பில் வழக்குரைஞா்கள் எஸ்.குமாரதேவன், துரை அருண் ஆகியோா் ஆஜராகி வாதிட்டனா். அரசுத் தரப்பில் ஆஜரான வழக்குரைஞா்

ஆா்.வினோத்ராஜா, உண்ணாவிரதப் போராட்டத்துக்கு அனுமதி வழங்குவதில் போலீஸாருக்கு எந்த ஆட்சேபமும் இல்லை என்று கூறினாா்.

இதையடுத்து வழக்கை விசாரித்த நீதிபதி, மனுதாரா் உண்ணாவிரதம் இருக்க அனுமதி கோரி புதிதாக போலீஸாருக்கு மனு வழங்க வேண்டும். அந்த மனுவை போலீஸாா் பரிசீலித்து அனுமதி வழங்க வேண்டும் என உத்தரவிட்டாா்.