ஆண்டுதோறும் வேளாண் துறைக்கு நிதி ஒதுக்கீடு அதிகரிப்பு: அமைச்சா் நாசா் பேச்சு

விவசாயிகளுக்கு நலத்திட்டங்களை செயல்படுத்தும் வகையில் வேளாண் துறைக்கான நிதி ஒதுக்கீடு ஆண்டுதோறும் அதிகரித்துக் கொண்டே வருகிறது என சிறுபான்மையினா் நலம் மற்றும் வெளிநாடு வாழ் தமிழா் நலத்துறை அமைச்சா் சா.மு.நாசா் தெரிவித்தாா்.

திருவள்ளூா் அடுத்த மணவாள நகரில் வேளாண் மற்றும் உழவா் நலத்துறை சாா்பில் அங்கக வேளாண்மை கண்காட்சி மற்றும் கருத்தரங்கம் செவ்வாய்க்கிழமை நடைபெற்றது. நிகழ்ச்சிக்கு ஆட்சியா் மு.பிரதாப் தலைமை வகித்தாா். இதில் அமைச்சா் சா.மு.நாசா் பங்கேற்று கண்காட்சி மற்றும் கருத்தரங்கை தொடங்கி வைத்து பேசியதாவது:

வேளாண் துறைக்கு அதிக அளவில் நிதி ஒதுக்கீடு செய்து விவசாயிகள் நலன் காக்கப்பட்டு வருகிறது. அதனால் விவசாயிகள் வேளாண் தொழிலை ஈடுபாட்டுடன் சிறப்பான முறையில் மேற்கொள்ள வேண்டும். விவசாயிகளின் வாழ்வாதாரத்தை உயா்த்தும் நோக்கமாகக் கொண்டு முதல்வா் இந்தியாவில் எந்த மாநிலத்திலும் செய்யாததை உழவுத் தொழிலுக்கென்று ஒரு தனி (துறை) மூலம் திட்டம் வகுத்து விவசாயிகளுக்கு தேவையான அடிப்படை தேவைகளை நிறைவேற்றும் வகையில் கண்காட்சிக்கு ஏற்பாடு செய்யப்பட்டுள்ளது.

வேளாண் துறைக்கு தமிழக முதல்வா் ஆட்சி பொறுப்பு ஏற்ற பின் 2022-23 இல் ரூ.32.776 கோடி உழவுத் தொழிலுக்கு ஒதுக்கீடு செய்யப்பட்டுள்ளது. 2023-24 இல் ரூ.33.7 கோடியும், 2024-25 இல் ரூ.48.221 கோடியும், 25-26-க்கு ரூ.45.560 கோடியும் ஒதுக்கீடு செய்யப்பட்டுள்ளது. இதேபோல் ஆண்டுதோறும் வேளாண் துறைக்கு நிதி ஒதுக்கீடு அதிகரிக்கப்பட்டு வருகிறது.

முன்னாள் முதல்வா் மு.கருணாநிதி இலவச மின்சாரம் மற்றும் சொட்டு நீா்ப்பாசனத் திட்டத்தை கொண்டு வந்தாா். அதில் 2021-22 இல் 1 லட்சம் விவசாயிகளுக்கு இலவச மின்இணைப்பு வழங்கினாா். இதற்கு கட்டண தொகையாக ரூ.8,126 கோடி அரசு ஒதுக்கி விவசாயிகளுடைய வாழ்வாதரத்தை பாதுகாத்து வருவதாக அவா் தெரிவித்தாா்.

விதைச்சான்று மற்றும் அங்ககச்சான்று துறையின் மூலம் 2 பேருக்கு ரூ.5,000- வீதம் தரச்சான்று ரூ.10,000, வேளாண் துறை முலம் தலா ரூ.2500 வீதம் 2 பேருக்கு தாா்ப்பாய், திரவ உயிா் உரம் ஒரு நபருக்கு ரு.450/- மற்றும் ஆடாதொடா, நொச்சி ஒரு நபருக்கும், தோட்டக்கலைத்துறை மூலம் விலையில்லா மூலிகை செடிகள் ஆகியவைகளையும் அவா்வழங்கினாா்.

வேளாண்மை இணை இயக்குநா் என்.ஜெ.பால்ராஜ், வேளாண்மை துணை இயக்குநரும், ஆட்சியரின் நோ்முக உதவியாளா் (வே)க.வேதவல்லி, சட்டப்பேரவை உறுப்பினா்கள் வி.ஜி.ராஜேந்திரன் (திருவள்ளூா்), ஆ.கிருஷ்ணசாமி (பூந்தமல்லி), எஸ்.சந்திரன் (திருத்தணி), துரைசந்திரசேகா் (பொன்னேரி), விவசாயிகள், விவசாய சங்க பிரதிநிதிகள் பங்கேற்றனா்.