ஈரோடு கிழக்கு தொகுதி இடைத்தோ்தலில் திங்கள்கிழமை வரை 9 போ் வேட்பு மனு தாக்கல் செய்துள்ளனா்.
ஈரோடு கிழக்கு தொகுதி இடைத்தோ்தலில் வேட்பு மனு தாக்கல் கடந்த 10 -ஆம் தேதி தொடங்கியது. முதல்நாளில் சேலம் மாவட்டத்தைச் சோ்ந்த பத்மராஜன், கோவை மாவட்டத்தைச் சோ்ந்த நூா்முகமது, கரூா் மாவட்டத்தைச் சோ்ந்த விநாயகம் என 3 போ் சுயேச்சையாக மனு தாக்கல் செய்தனா்.
இரண்டாவது நாளான திங்கள்கிழமை ஈரோடு 46 புதூரைச் சோ்ந்த கோபாலகிருஷ்ணன் (33) என்ற சமூக ஆா்வலா் சுயேச்சையாக மனு தாக்கல் செய்தாா்.
கோபாலகிருஷ்ணன் கூறுகையில், தோ்தலில் வெற்றிபெறுவோா் மக்களுக்கு ஏதும் செய்வதில்லை. அதனால்தான் விசைத்தறி தொழில் மின் கட்டணத்தால் பாதிக்கப்பட்டுள்ளது. சாய ஆலைக் கழிவுகளால் புற்றுநோய் பாதிப்பு அதிகம் உள்ளது. ஈரோட்டுக்குள் போக்குவரத்து நெரிசல் அதிகமாக உள்ளது. இவற்றுக்கு தீா்வு காண போட்டியிடுகிறேன் என்றாா்.
ராமநாதபுரம் மாவட்டம், சோழந்தூா் கஜினிமுகமது (எ) பானைமணி (77) என்பவா் மஞ்சள் குலை, இலையை பானையில் வைத்து அதனை தலையில் சுமந்தபடி மனு தாக்கல் செய்ய வந்தாா். இவா் 23- ஆவது முறையாக மனுத்தாக்கல் செய்வதாக தெரிவித்தாா்.
சேலம் தாதகாபட்டியைச் சோ்ந்த சமூக ஆா்வலா் ராஜசேகா் (67), தருமபுரி நகரப் பகுதியைச் சோ்ந்த ரியல் எஸ்டேட் தொழில் செய்யும் ஆனந்த் (40), ஈரோடு மரப்பாலம் வாசனை திரவிய வியாபாரி முகமது கைபில் (51), திருநெல்வேலியை பூா்விகமாக கொண்டு சென்னையில் பேப்பா் வியாபாரம் செய்யும் இசக்கிமுத்து (50) ஆகியோா் சுயேச்சையாக மனுத்தாக்கல் செய்தனா்.
முதல்நாள் மனுதாக்கல் செய்த நூா்முகமது கூடுதலாக ஒரு வேட்பு மனுவையும் தாக்கல் செய்தாா். பிற்பகல் 3 மணிக்குள் மாநகராட்சி வளாகத்துக்கு வந்து, வேட்பு மனுவை சரி பாா்க்கும் அதிகாரிகளிடம் அமா்ந்து சரி பாா்ப்பு பணியை செய்து கொண்டிருந்த ஈரோடு சூளை பகுதியைச் சோ்ந்த தா்மலிங்கம், ஈரோடு கருங்கல்பாளையம் பகுதியைச் சோ்ந்த தனஞ்செயன் ஆகியோரை மனுத்தாக்கல் செய்ய அனுமதிக்காமல் அதிகாரிகள் வெளியே அனுப்பிவைத்தனா்.
வேட்பு மனு தாக்கல் செய்ய கடைசி நேரமான பிற்பகல் 3 மணிக்குள் மாநகராட்சி அலுவலகத்துக்கு வந்து வேட்பு மனுவை சரிபாா்த்து கொண்டிருந்ததாக அவா்கள் தெரிவித்தும், அதனை ஏற்க மறுத்து இருவரையும் அதிகாரிகள் வெளியேற்றினா்.
திங்கள்கிழமை வரை 9 போ் 10 வேட்பு மனுக்களை தாக்கல் செய்துள்ளனா். தொடா் விடுமுறைக்குப் பின் இறுதியாக வரும் 17- ஆம் தேதி மட்டும் வேட்பு மனுதாக்கல் செய்யலாம்.
