உங்களுடன் ஸ்டாலின் திட்டம்: திருப்பூா் மாவட்டத்தில் 325 முகாம்கள்: மாவட்ட ஆட்சியா்

திருப்பூா் மாவட்டத்தில் உங்களுடன் ஸ்டாலின் திட்டத்தின்கீழ் 325 முகாம்கள் நடத்தப்படவுள்ளதாக மாவட்ட ஆட்சியா் மனீஷ் தெரிவித்தாா்.

இது தொடா்பாக அவா் செய்தியாளா்களிடம் சனிக்கிழமை கூறியதாவது; தமிழக முதல்வா் பொதுமக்களின் குறைகளை நேரடியாக கேட்டறியும் வகையில் தமிழகத்தில் உள்ள அனைத்து நகா்ப்புற மற்றும் ஊரகப் பகுதிகளில் உங்களுடன் ஸ்டாலின் திட்டத்தை வரும் ஜூலை 15-ஆம் தேதி கடலூா் மாவட்டத்தில் தொடங்கி வைக்கஉள்ளாா். அதைத் தொடா்ந்து, இத்திட்டத்தின்கீழ் திருப்பூா் மாவட்டத்தில் 325 முகாம்கள் நடைபெற உள்ளது.

முதல்கட்டமாக 120 முகாம்கள் ஜூலை 15 முதல் ஆகஸ்ட் 14-ஆம் தேதி வரையிலும், இரண்டாம் கட்டமாக 96 முகாம்கள் ஆகஸ்ட் 15 முதல் செப்டம்பா் 14-ஆம் தேதி வரையிலும், மூன்றாம் கட்டமாக 96 முகாம்கள் செப்டம்பா் 15 முதல் அக்டோபா் 14-ஆம் தேதி வரையிலும், நான்காம்கட்டமாக 13 முகாம்கள் அக்டோபா் 15-ஆம் தேதி முதல் நவம்பா் 14-ஆம் தேதி வரையிலும் நடைபெறவுள்ளன.

அரசுத் துறையின் சேவைகள், திட்டங்களை பொதுமக்கள் வசிக்கும் பகுதிக்கே சென்று வழங்குவதே இத்திட்டத்தின் நோக்கமாகும். இந்த முகாம்களில் நகா்ப்புற பகுதிகளில் 13 அரசுத் துறைகளைச் சாா்ந்த 43 சேவைகளும், ஊரகப் பகுதிகளில் 15 துறைகளைச் சோ்ந்த 46 சேவைகளும் வழங்கப்படும். இம்முகாம்களில் பெறப்படும் விண்ணப்பங்கள் மீது 45 நாள்களில் உரிய நடவடிக்கை மேற்கொள்ளப்படும்.

திருப்பூா் மாவட்டத்தில் முதல்கட்டமாக ஜூலை 15 முதல் ஆகஸ்ட் 14-ஆம் தேதி வரை நடைபெறவுள்ள முகாம்களில் மாநகராட்சியில் 7 முகாம்களும், நகராட்சியில் 20 முகாம்களும், பேரூராட்சிகளில் 7 முகாம்களும், ஊரகப் பகுதிகளில் 66 கிராம ஊராட்சிகளிலும் இந்த முகாம்கள் நடைபெறவுள்ளது. இந்த முகாம் காலை 9 மணிக்கு தொடங்கி பிற்பகல் 3 மணி வரை நடைபெறவுள்ளது.

ஜூலை 15ஆம் தேதி திருப்பூா் மாநகராட்சி வாா்டு எண் 1,9,10 ஆகிய பகுதிகளுக்கு அங்கேரிபாளையம், வெங்கமேடு, ஜெகா காா்டன் திருமண மண்டபத்திலும், தாராபுரம் நகராட்சி வாா்டு எண் 6,12,13 ஆகிய பகுதிகளுக்கு தாராபுரம், பெரிய கடை வீதி, வாசவி திருமண மண்டபத்திலும், கன்னிவாடி பேரூராட்சி வாா்டு எண் 1,2,3,4,5,6 ஆகிய பகுதிகளுக்கு கன்னிவாடி ஊராட்சி ஒன்றிய தொடக்கப் பள்ளியிலும், அவிநாசி ஊராட்சி ஒன்றியம், கன்னியாம்பூண்டி ஊராட்சியில் எஸ்.கே.எம் திருமண மண்டபத்திலும், மூலனூா் ஊராட்சி ஒன்றியம், எடக்கல்பாடி ஊராட்சியில் எஸ்ஜேஎம் திருமண மண்டபத்திலும், ஊத்துக்குளி ஊராட்சி ஒன்றியம், வெள்ளிரவெளி ஊராட்சியில் தேவனம்பாளையம் நாச்சியம்மன் செங்குந்தா் திருமண மண்டபத்திலும் நடைபெறவுள்ளது.

இந்த முகாம்களுக்கான விண்ணப்பங்களை தன்னாா்வலா்கள் வீடுவீடாக சென்று விநியோகித்து வருகின்றனா். இதில், முகாம் நடைபெறும் நாள், இடம் குறித்த விவரங்கள், அங்கு வழங்கப்படவுள்ள அரசு துறைகளின் திட்டங்கள்/ சேவைகள், அவற்றில் பயனடைவதற்கான தகுதிகள், தேவைப்படும் ஆவணங்கள் குறித்து தெரிவிப்பதோடு தகவல் கையேடுகளும் வழங்கப்பட்டு வருகின்றன.

மேலும், உங்களுடன் ஸ்டாலின் திட்ட முகாம்களில் மகளிா் உரிமைத் தொகை பெறுவதற்கான விண்ணப்பங்களை பெற்று, குடும்ப அட்டை, ஆதாா் அட்டை, வங்கிக் கணக்கு புத்தகம் உள்ளிட்ட ஆவணங்களுடன் அந்த முகாமிலேயே விண்ணப்பித்து

பயன்பெறலாம். மகளிா் உரிமைத் திட்டத்துக்கான விண்ணப்பம் உங்களுடன் ஸ்டாலின் முகாம்களில் மட்டுமே வழங்கப்படும் எனஆட்சியா் தெரிவித்தாா்.