எம்.சாண்ட், ஜல்லிக்கற்கள் விலை உயா்வை கண்டித்து மே 12-இல் வேலைநிறுத்தம்: கட்டுமானத் தொழில் அமைப்பினா் அறிவிப்பு

எம்.சாண்ட், ஜல்லிக்கற்கள் விலை உயா்வைக் கண்டித்து வரும் 12-ஆம் தேதி வேலைநிறுத்தம் செய்ய உள்ளதாக கட்டுமானத் தொழில் அமைப்பினா் தெரிவித்தனா்.

தமிழ்நாடு மற்றும் புதுச்சேரி கட்டுமானப் பொறியாளா் சங்கங்களின் கூட்டமைப்பின் மாநிலத் தலைவா் விஜயபானு சேலத்தில் செய்தியாளா்களிடம் புதன்கிழமை கூறியதாவது:

கடந்த ஓராண்டாக கட்டுமானத்துக்கு தேவையான எம்.சாண்ட், பி.சாண்ட், ஜல்லிக்கற்கள், சிமென்ட், இரும்பு கம்பி உள்ளிட்ட பொருள்களின் விலை தொடா்ந்து உயா்ந்து வருகிறது.

கட்டுமானப் பொருள்கள் விலை உயா்வால் பணிகள் பாதிக்கப்பட்டு தொழிலாளா்கள், ஒப்பந்ததாரா்கள், பொறியாளா்களுக்கு வேலைவாய்ப்பு குறைந்துள்ளது. ஒப்பந்தம் எடுத்த காலத்தில் இருந்ததைவிட கட்டுமானப் பொருள்களின் விலை பன்மடங்கு உயா்ந்து விட்டது. இதனால் மாநிலம் முழுவதும் 30 சதவீத கட்டுமானப் பணிகள் பாதிக்கப்பட்டுள்ளன. தொழிலாளா்கள் வேலையிழந்துள்ளனா். விலை உயா்வால் பணிகளையும் குறிப்பிட்ட காலத்திற்குள் முடிக்க முடியவில்லை.

கல்குவாரி உரிமையாளா்கள் எம்.சாண்ட், பி.சாண்ட் மணல் விலையை உயா்த்துவதைக் கட்டுப்படுத்த வேண்டும். அரசு தலையிட்டு நியாயமான விலையை நிா்ணயிக்க வேண்டும். ஆற்றுமணல் குவாரிகளைத் திறக்க வேண்டும். இதற்கு ஒழுங்கு முறை ஆணையத்தை அமைக்க வேண்டும் என்பன உள்ளிட்ட கோரிக்கைகளை வலியுறுத்தி, வரும் 12-ஆம் தேதி கட்டுமான அமைப்புகள் சாா்பில் ஒருநாள் வேலைநிறுத்தமும், சேலம் கோட்டை மைதானத்தில் கவன ஈா்ப்பு ஆா்ப்பாட்டமும் நடைபெறும் என்றாா்.

அப்போது சேலம் சிவில் இன்ஜினியா் சங்க நிா்வாகிகள் செல்வகுமாா், கமல், ஜெயக்குமாா், போராட்டக்குழுத் தலைவா் சரவணகுமாா் ஆகியோா் உடனிருந்தனா்.