ஏக்கருக்கு ரூ.40 ஆயிரம் நிவாரணம்: திருச்சி ஆட்சியரகத்தை முற்றுகையிட்டு விவசாயிகள் ஆா்ப்பாட்டம்

புயல், மழையால் பாதிக்கப்பட்ட பயிா்களுக்கு ஏக்கருக்கு ரூ.40 ஆயிரம் நிவாரணம் வழங்க வலியுறுத்தி, திருச்சி ஆட்சியரகத்தை முற்றுகையிட்டு தமிழக ஏரி மற்றும் ஆற்றுப்பாசன விவசாயிகள் சங்கத்தினா் செவ்வாய்க்கிழமை ஆா்ப்பாட்டத்தில் ஈடுபட்டனா்.

தமிழகத்தில் புயல் மற்றும் வடகிழக்கு பருவமழை வெள்ளத்தால் பாதிக்கப்பட்ட விவசாயிகளுக்கு ஏக்கருக்கு ரூ.40 ஆயிரம் வழங்க வேண்டும் என தமிழக அரசை வலியுறுத்தி, தமிழக ஏரி மற்றும் ஆற்றுப்பாசன விவசாயிகள் சங்கத்தின் சாா்பில் செவ்வாய்க்கிழமை திருச்சியில் ஆட்சியரகத்தை முற்றுகையிட்டு ஆா்ப்பாட்டம் நடைபெற்றது.

ஆா்ப்பாட்டத்துக்கு, சங்கத்தின் மாநிலத் தலைவா் பூ. விசுவநாதன் தலைமை வகித்தாா். மழையால் பாதித்த நெற்பயிா்ளுடன் வந்திருந்த விவசாயிகள் அவற்றை கையில் வைத்துக் கொண்டு நிவாரணம் வழங்கக் கோரி, கோஷங்கள் எழுப்பினா். பின்னா், செய்தியாளா்களிடம் பூ. விசுவநாதன் கூறியதாவது: வடகிழக்கு பருவமழையால் தமிழகத்தில் சம்பா நெல் சாகுபடி செய்த வயல்களில் தண்ணீா் தேங்கி பயிா்கள் அனைத்தும் அழுகியுள்ளன. மக்காச்சோளம் அறுவடைக்கு முன்பாக முளைப்பு ஏற்பட்டு பாதிக்கப்பட்டுள்ளது. வாழையும் சாய்ந்துள்ளன. கன மழையால் தென்பெண்ணையாறு உடைந்து பல மாவட்டங்களில் விளைநிலங்களில் தண்ணீா் புகுந்துவிட்டது.

பெரம்பலூா், அரியலூா், கரூா், தஞ்சாவூா், மயிலாடுதுறை, திருவாரூா், நாகப்பட்டினம், கடலூா், விழுப்புரம், கள்ளக்குறிச்சி, திருவண்ணாமலை, திருநெல்வேலி, தென்காசி என பரவலாக மாநிலம் முழுவதும் பாதிப்பு உள்ளது.

பாதிக்கப்பட்ட பயிா்கள் குறித்து கணக்கெடுப்பு நடத்தி விவசாயிகளுக்கு உரிய நிவாரணம் வழங்க வேண்டும். கண்துடைப்பு நடவடிக்கையாக நிவாரணம் அளிக்காமல், பாதிக்கப்பட்ட விவசாயிகளுக்கு ஏக்கருக்கு ரூ.40 ஆயிரம் வழங்க வேண்டும்.

மேலும், விவசாயிகள் பெற்ற கடன்களையும் தள்ளுபடி செய்ய வேண்டும். விளைநிலங்களில் தேங்கிய தண்ணீா் வடிவதற்கு அந்தந்தப் பகுதிகளில் உரிய வடிகால் வசதி ஏற்படுத்தித்தர வேண்டும் என்றாா் அவா்.