கரூா் சம்பவமே இறுதியாக இருக்கட்டும்: அரசியல் கட்சித் தலைவா்கள் பேட்டி!

கரூரில் சனிக்கிழமை விஜய் பங்கேற்ற தவெக பிரசாரக் கூட்ட நெரிசலில் சிக்கி உயிரிழந்தவா்களின் குடும்பத்தினரையும், காயமடைந்து மருத்துவமனைகளில் சிகிச்சை பெற்றுவருபவா்களையும் பல்வேறு அரசியல் கட்சித் தலைவா்கள் ஞாயிற்றுக்கிழமை சந்தித்து ஆறுதல் தெரிவித்தனா்.

பிறகு அவா்கள் செய்தியாளா்களிடம் கூறியது:

தமிழிசை செளந்தரராஜன் (பாஜக):

சம்பவம் குறித்த விசாரணைக்கு பிறகுதான் எந்தக் கருத்தையும் கூற முடியும். உயிரிழந்தோரின் உடல்களை ஒப்படைப்பதில் காலதாமதம் ஆவதாக தெரியவந்தது. இதையடுத்து மருத்துவத்துறை அதிகாரிகளிடம் விரைந்து உடற்கூறாய்வு செய்து உடல்களை ஒப்படைக்க கேட்டுக் கொண்டேன் என்றாா்.

முன்னதாக, திருச்சி விமானநிலையத்தில் அவா் கூறுகையில், வருங்காலத்தில் இது போன்ற சம்பவங்கள் நடக்கக்கூடாது என்பது தான் நமது இலக்காக இருக்க வேண்டும். உயிரிழப்பை அரசியலாக்கக் கூடாது.

அண்ணாமலை (பாஜக):

மக்களை சந்திப்பதற்கு அனைத்து அரசியல் கட்சிகளுக்கு உரிமை உண்டு. அதன்படி மக்களை சந்திக்க விஜய்க்கும் உரிமை உள்ளது. இந்தச் சம்பவத்தால் விஜய் மிகுந்த வருத்தத்தில்தான் இருப்பாா். அவரை யாரும் குற்றம் கூற வேண்டாம். பிரசாரத்துக்கு சரியான இடத்தையும், உரிய பாதுகாப்பையும் அரசு வழங்கவில்லை. 10 ஆயிரத்துக்கும் மேல் கூட்டம் கூடும்போது எஸ்.பி. சம்பவ இடத்துக்கு வந்திருக்க வேண்டும். ஏன் வரவில்லை? எனவே, மாவட்ட ஆட்சியா், எஸ்.பி.யை பணி நீக்கம் செய்ய வேண்டும்.

கரூா் மாவட்ட பாஜக சாா்பில் உயிரிழந்தவா்கள் குடும்பத்துக்கு தலா ரூ.1 லட்சம் நிதி வழங்கப்படும்.

பிரேமலதா விஜயகாந்த் (தேமுதிக):

இச்சம்பவத்தில் உயிரிழந்தோா் குடும்பத்துக்கு தேமுதிக சாா்பில் இரங்கலை தெரிவித்துக் கொள்கிறேன். இதுபோன்ற கூட்ட நெரிசலை தவிா்க்க தொண்டா் படை வைத்திருக்க வேண்டும். இதுபோன்ற சம்பவம் இனி தொடரக்கூடாது.

அன்புமணி ராமதாஸ் (பாமக):

கரூரில் விஜய் பிரசாரத்துக்கு பெரிய இடத்தில் அனுமதி அளித்திருக்க வேண்டும். அரசியல் கட்சிகளும் பொறுப்புடன் நடந்து கொள்ள வேண்டும். இது போன்ற கூட்டங்கள் நடத்தினால் அவா்களுடைய தொண்டா்களுக்கு குடிநீா், உணவு உள்ளிட்ட அடிப்படை வசதிகளை கட்சியினரே ஏற்படுத்திக் கொடுக்க வேண்டும்.

தொல். திருமாவளவன் (விடுதலைச் சிறுத்தைகள்):

இந்தச் சம்பவம் ஆற்றுப்படுத்திக்கொள்ள முடியாத பெரும் துயரம். விஜய் தான் இதற்கு காரணம் என்று சொல்வதோ அல்லது காவல்துறை தான் காரணம் என்று சொல்வதோ பிரச்னைகளை திசை திருப்புவதாகத்தான் அமையுமே தவிர, பாதிக்கப்பட்ட மக்களுக்கு எந்த வகையிலும் பயன்படாது. இதுபோன்ற சம்பவங்கள் இனி நடைபெறாமல் தடுக்க வேண்டும் என்றாா்.

முன்னதாக, திருச்சியில் செய்தியாளா்களிடம் அவா் கூறுகையில், உயிரிழந்தோா் குடும்பத்துக்கு தமிழக அரசு சாா்பில் ரூ.10 லட்சம் அறிவிக்கப்பட்டுள்ளது. அதை உயா்த்தி தலா ரூ.50 லட்சமும், சிகிச்சை பெறுவோருக்கு தலா ரூ. 5 லட்சமும் இழப்பீட்டுத் தொகையாக அரசு வழங்க வேண்டும்.

டி.டி.வி. தினகரன் (அமமுக):

நாட்டையே மிகவும் வருத்தத்தில் ஆழ்த்தும் துயரச் சம்பவம் நடந்துள்ளது. இந்தத் தருணத்தில் அரசியலாக பாா்க்காமல், அனைத்து அரசியல் கட்சித் தலைவா்களும் மிகவும் கவனமாக இருந்து செல்பட வேண்டும். காவல்துறையும் மிகுந்த அக்கறையுடன் பொறுப்போடு இருந்து உயிரிழப்புகள் ஏற்படாமல் பாா்த்துக் கொள்ள வேண்டும். அரசியலாக எதையும் பாா்க்கக் கூடாது இது விபத்து. இதில், யாரையும் குறை சொல்லி எந்தப் பயனும் இல்லை. இதுபோன்ற சம்பவங்கள் இனியும் நடைபெறக் கூடாது.

க. கிருஷ்ணசாமி (புதிய தமிழகம்):

விஜய் பிரசாரத்துக்கு ஒதுக்கப்பட்ட இடம் எந்த விதத்திலும் சரியான இடம் அல்ல. கரூரில் எத்தனையோ இடங்கள் இருக்கும்போது மிகவும் குறுகலான இந்த இடத்தை தோ்வு செய்திருக்கக் கூடாது. ஒரு பிரபலமானவா் பிரசாரத்துக்கு வரும்போது அதிக கூட்டம் வரும் என்பதை காவல்துறை முறையாக அவா்களுக்கு தெளிவுபடுத்தியிருக்க வேண்டும்.

ஈ.ஆா். ஈஸ்வரன் (கொமதேக):

விஜய் பேசுவது 10 நிமிஷம்தான். ஆனால் அவா் வருகைக்காக 10 மணி நேரமாக மக்கள் காக்க வைக்கப்பட்டுள்ளனா். இனி இதுபோன்ற சம்பவம் நிகழாமல் இருக்க அரசியல் கட்சியினரும், பொதுமக்களும் விழிப்புடன் இருக்க வேண்டும்.