காவிரியிலிருந்து தமிழகத்திற்கு அக்டோபரில் 20.22 டிஎம்சி தண்ணீா் கா்நாடகம் திறக்க வேண்டும்: காவிரி நீா் மேலாண்மை ஆணையம் உத்தரவு!

உச்சநீதிமன்ற தீா்ப்பின்படி காவிரியிலிருந்து தமிழகத்திற்கு அக்டோபா் மாதத்தில் 20.22 டிஎம்சி தண்ணீரை கா்நாடகம் திறந்து விட காவிரி நீா் மேலாண்மை ஆணையம் வெள்ளிக்கிழமை உத்தரவிட்டது.

தமிழகம்,கா்நாடகம் இடையே காவிரி நதி நீா் பங்கீட்டு பிரச்சனை பல ஆண்டுகளாக நிலவி வந்த நிலையில் இது தொடா்பான வழக்கில் உச்சநீதிமன்றம் 2018 ஆம் ஆண்டு தீா்ப்பு வழங்கியது. அப்போது கா்நாடகம் எந்தெந்த மாதங்களில் எவ்வளவு நீா் தமிழகத்திற்க்கு திறந்துவிட வேண்டும் என்பதை அந்த தீா்ப்பின் மூலம் உச்சநீதிமன்றம் நிா்ணயம் செய்தது. அந்த தீா்ப்பை அமல்படுத்தவும், காவிரி நீா் பங்கீட்டை கண்காணிக்கவும் காவிரி நீா் மேலாண்மை ஆணையம் மற்றும் காவிரி நீா் முறைப்படுத்தும் குழு ஆகிய இரு அமைப்புகளையும் உச்ச நீதிமன்றம் அமைத்தது. அதன்படி இந்த இரு அமைப்புகளும் அவ்வப்போது கூடி காவிரி நதி நீா் பங்கீடு தொடா்பாக உச்சநீதிமன்ற தீா்ப்பின்படி உத்தரவுகளை பிறப்பித்து வருகின்றன.

இந்நிலையில் காவிரி நீா் மேலாண்மை ஆணையத்தின் 44 வது கூட்டம் தில்லியில் வெள்ளிக்கிழமை (26.09.2025) நடைபெற்றது .காவிரி நீா் மேலாண்மை ஆணைய அலுவலகத்தில் அந்த ஆணையத்தின் தலைவா் எஸ்.கே. ஹல்தாா் தலைமையில் கூட்டம் நடைபெற்றது.ஹைபிரிட் முறையில் நடைபெற்ற இக்கூட்டத்தில் தமிழகம் ,கா்நாடகம்,கேரளம் மற்றும் புதுச்சேரி அரசு பிரதிநிதிகள் பங்கேற்றனா்.

தமிழக நீா்வளத்துறை செயலாளா் ஜெ.ஜெயகாந்தன், காவிரி தொழில்நுட்பக் குழு தலைவா் இரா. சுப்பிரமணியம் ஆகியோா் சென்னை தலைமை செயலகத்திலிருந்து காணொளி காட்சி வாயிலாக இந்த கூட்டத்தில் கலந்து கொண்டனா். தமிழ்நாடு உறுப்பினா், தற்போது (25.09.2025) மேட்டூா் அணையின் நீா் இருப்பு 92.105 டிஎம்சியாக உள்ளது என்றும் அணைக்கு நீா்வரத்து வினாடிக்கு 8,419 கன அடியாக உள்ளது என்றும் அணையில் இருந்து வினாடிக்கு 9,033 கன அடி நீா் விவசாயம், குடிநீா் மற்றும் தொழிற்சாலை பயன்பாட்டிற்காக திறந்து விடப்படுகிறது என்றும் தெரிவித்தாா் .மேலும், கா்நாடகம் அணைகளின் நீா் இருப்பு மற்றும் நீா் வரத்து கணிசமான அளவு தொடா்ந்து வருவதினாலும், தமிழகத்திற்கு 2025 அக்டோபா் மாதத்திற்கு வழங்கப்பட வேண்டிய நீா் அளவான 20.22 டிஎம்சி நீரினை உச்சநீதிமன்ற ஆணையின்படி கா்நாடகம் பில்லிகுண்டுலுவில் வழங்குவதை உறுதி செய்யுமாறு ஆணையத்தை வலியுறுத்தினாா்.இதனையடுத்து உச்ச நீதிமன்ற தீா்ப்பின்படி தமிழகத்திற்கு அக்டோபா் மாதம் கா்நாடகா 20.22 டிஎம்சி தண்ணீரை திறந்து விடுமாறு காவிரி நீா் மேலாண்மை ஆணையம் உத்தரவிட்டது.