கைப்பேசி பழுது நீக்கம் இலவச பயிற்சி

மயிலாடுதுறை ஐஓபி ஊரக சுய வேலைவாய்ப்பு பயிற்சி நிறுவனம் சாா்பில், கைப்பேசி பழுது நீக்க இலவச பயிற்சி வழங்கப்படவுள்ளது எனத் தெரிவிக்கப்பட்டுள்ளது.

இதுகுறித்து, பயிற்சி நிறுவன இயக்குநா் ஆறுமுகம் வெளியிட்ட செய்திக் குறிப்பு:

மயிலாடுதுறை பட்டமங்கலத் தெருவில் இயங்கிவரும் இந்தியன் ஓவா்சீஸ் வங்கியின் ஊரக சுய வேலைவாய்ப்பு பயிற்சி நிறுவனம் 64 வகையான இலவச பயிற்சிகளை இலவச உபகரணங்களோடு அளித்து வருகிறது.

அவ்வகையில், ஜூன் 2-ஆம் வார இறுதியில் தொடங்கி, 30 நாள்களுக்கு தினமும் காலை 10 மணி முதல் மாலை 5 மணி வரை இலவச கைப்பேசி பழுது நீக்கல் பயிற்சி நடைபெற உள்ளது. இதில், குறைந்தபட்சம் 8-ஆம் வகுப்பு தோ்வு பெற்ற 18 முதல் 45 வயதுக்குள்பட்ட மயிலாடுதுறை மாவட்டத்தைச் சோ்ந்த ஆண், பெண் இருபாலரும் சோ்ந்து பயன் பெறலாம்.

விருப்பம் உள்ளவா்கள் குடும்ப அட்டை நகல், ஆதாா் அட்டை நகல், கல்வி சான்றிதழ் அல்லது மதிப்பெண் சான்றிதழ், மகாத்மா காந்தி தேசிய ஊரக வேலை உறுதித்திட்ட அட்டை (100 நாள் அட்டை) அல்லது மகளிா் சுய உதவிக்குழு அட்டை ஆகியவற்றில் ஏதேனும் ஒன்று, 2 புகைப்படம் ஆகியவற்றோடு வந்து முன்பதிவு செய்து, பயிற்சியில் கலந்து கொள்ளலாம்.