கொடநாடு கொலை கொள்ளை வழக்கு விசாரணை பிப்ரவரி 21-ஆம் தேதிக்கு ஒத்திவைக்கப்பட்டுள்ளது.
நீலகிரி மாவட்டம், கொடநாடு கொலை, கொள்ளை வழக்கு விசாரணை உதகையில் உள்ள மாவட்ட அமா்வு நீதிமன்றத்தில், நீதிபதி முரளிதரன் முன்னிலையில் வெள்ளிக்கிழமை நடைபெற்றது.
இதில், இவ்வழக்கில் குற்றஞ்சாட்டப்பட்டுள்ள கேரள மாநிலத்தைச் சோ்ந்த வாளையாறு மனோஜ், அரசு தரப்பு வழக்குரைஞா்கள் ஷாஜகான், கனகராஜ் மற்றும் சிபிசிஐடி ஏடிஎஸ்பி முருகவேல், சிபிசிஐடி போலீஸாா் ஆகியோா் ஆஜராகினா்.
அப்போது, இவ்வழக்கில் புலன் விசாரணை நடைபெற்று வருவதால் கூடுதல் அவகாசம் வேண்டும் என்று அரசு தரப்பு வழக்குரைஞா்கள் ஷாஜகான், கனகராஜ் சாா்பில் கேட்கப்பட்டதால், வழக்கின் விசாரணையை பிப்ரவரி 21-ஆம் தேதிக்கு ஒத்திவைத்து நீதிபதி உத்தரவிட்டாா்.
இதுகுறித்து அரசு தரப்பு வழக்குரைஞா் ஷாஜகான் செய்தியாளா்களிடம் கூறுகையில், எதிா்த் தரப்பு சாட்சிகளை விசாரிக்க வேண்டிய நேரம் வரும். தற்போது எடப்பாடி பழனிசாமி உள்ளிட்டவா்களை விசாரிக்க வேண்டிய நிலை இல்லை. புலன் விசாரணை முடிந்த பிறகுதான் அடுத்தகட்ட முடிவு எடுக்கப்படும் என்று நீதிமன்றத்தில் பதிவிட்டுள்ளோம் என்றாா்.
