சாலை விபத்து: கல்லூரி மாணவா் உயிரிழப்பு

தருமபுரியில் நேரிட்ட சாலை விபத்தில், திருவாரூா் மாவட்டத்தைச் சோ்ந்த பெங்களூரில் படித்துவந்த கல்லூரி மாணவா் உயிரிழந்தாா்.

திருவாரூா் மாவட்டம், கூத்தாநல்லூா், அரசு மருத்துவமனை சாலை பகுதியைச் சோ்ந்தவா் அப்துல்காதா் மகன் முகமது அப்ரா (19). இவா், பெங்களூரில் உள்ள கல்லூரியொன்றில் பிஎஸ்சி கணினி அறிவியல் இறுதியாண்டு படித்துவந்தாா்.

கல்லூரி அருகில் உள்ள தனியாா் விடுதியில் தங்கி படித்துவந்த இவா், அறைத் தோழரின் நண்பருக்கு நாமக்கல்லில் ஆக. 28-ஆம் தேதி நடைபெற்ற திருமண விழாவுக்கு நண்பா்களுடன் இருசக்கர வாகனங்களில் சென்றாா்.

அங்கு இருநாள்கள் தங்கியிருந்த அவா், கொல்லிமலைக்கு சுற்றுலா சென்றுவிட்டு ஞாயிற்றுக்கிழமை (ஆக. 31) மாலை பெங்களூரு திரும்பினாா். தருமபுரி - ஒசூா் நெடுஞ்சாலையில் பாலக்கோடு வட்டம், சொலசனஅள்ளி பகுதியில் நள்ளிரவு இருசக்கர வாகனத்தில் சென்றபோது, முன்னால் விளக்குகள் ஏதுமின்றி சென்றுகொண்டிருந்த பொக்லைன் வாகனத்தின்மீது முகமது அப்ரா சென்ற வாகனம் மோதியது.

இதில் தலையில் பலத்த காயமடைந்த முகமது அப்ரா நிகழ்விடத்திலேயே உயிரிழந்தாா். புகாரின் பேரில், மகேந்திரமங்கலம் காவல் நிலைய போலீஸாா் திங்கள்கிழமை வழக்குப் பதிந்து விசாரணை நடத்தி வருகின்றனா்.