டங்ஸ்டன் சுரங்கம்: ``கீழடியில் 10 அடி தோண்ட அனுமதி தராத ஒன்றிய அரசு...'' - மக்களவையில் கொதித்த சு.வெ
Admin
- yesterday
மதுரையில் அரிட்டாபட்டி மற்றும் அதனைச் சுற்றியுள்ள பகுதிகளில் சுமார் 5,000 ஏக்கர் பரப்பளவில் டங்ஸ்டன் சுரங்கம் அமைப்பதற்கு எதிராக அப்பகுதி மக்கள் தொடர்ச்சியாகப் போராட்டம் நடத்தி வருகின்றனர். தமிழக முதல்வர் ஸ்டாலினும், சுரங்கம் அமைக்க அளித்த அனுமதியை உடனடியாக மத்திய அரசு ரத்து செய்ய வேண்டும் என பிரதமர் மோடிக்கு கடிதம் எழுதியிருக்கிறார்.
இந்த நிலையில், மதுரை கம்யூனிஸ்ட் எம்.பி சு. வெங்கடேசன், `அரிட்டாபட்டியில் டங்ஸ்டன் சுரங்கம் அமைப்பது தமிழ்நாட்டின் வளத்தையும், வரலாற்றையும் அழிக்கும் முயற்சி' என்று நாடாளுமன்றத்தில் மத்திய அரசுக்கு எதிர்ப்பு தெரிவித்திருக்கிறார்.
நாடாளுமன்றத்தில் நடைபெற்று வரும் குளிர்கால கூட்டத்தொடரில் இன்று மக்களவையில் உரையாற்றிய சு. வெங்கடேசன், ``ஒன்றிய அரசு மதுரை அரிட்டாபட்டியில் டங்ஸ்டன் சுரங்கம் அமைக்க அனுமதித்திருக்கிறது. அந்த அனுமதியை, ஏல உத்தரவை உடனடியாக ரத்து செய்ய வேண்டும். இந்தியாவில் வேறெங்கும் இல்லாத அரியவகை நிலம் அரிட்டாபட்டி நிலம்.
அங்கே 3,500 ஆண்டுகளுக்கு முந்தைய பெருங்கற்கால படுக்கை இருக்கிறது. 2,200 ஆண்டுகளுக்கு முந்தைய தமிழி கல்வெட்டு இருக்கிறது. 2,000 ஆண்டுகளுக்கு முந்தைய சமண சிற்பம் இருக்கிறது. 1,200 ஆண்டுகளுக்கு முன்பு பாண்டியன் கட்டிய சிவன் குகைக் கோயில் இருக்கிறது. 800 ஆண்டுகளுக்கு முன்பு பிற்கால பாண்டியர்கள் அமைத்த ஏரி இருக்கிறது. வரலாறு முழுக்க தனது மேனியில் வரலாற்றுச் சின்னங்களை ஏந்தியிருக்கும் அரிட்டாபட்டியில் டங்ஸ்டன் சுரங்கம் அமைக்கின்ற ஒன்றிய அரசின் முடிவு கைவிடப்பட வேண்டும். இமயம் எப்படி இந்தியாவைக் காத்து நிற்கிறதோ, அதுபோல இமயன் என்ற சொல் இருக்கின்ற அரிட்டாபட்டியை நாங்கள் காத்து நிற்போம்.
அரிட்டாபட்டியில் டங்க்ஸ்டன் சுரங்கம் அமைக்க இந்துஸ்தான் ஜிங்க் நிறுவத்திற்கு வழங்கப்பட்ட ஏலத்தை ரத்து செய்யக் கோரி எனது நாடாளுமன்ற உரை ;
— Su Venkatesan MP (@SuVe4Madurai) December 3, 2024
அவைத் தலைவர் அவர்களுக்கு வணக்கம் ,
ஒன்றிய அரசு மதுரை மாவட்டம் மேலூர் அரிட்டாபட்டியில் டங்ஸ்டன் சுரங்கம் அமைக்க அனுமதித்திருக்கிறது . அந்த… pic.twitter.com/ahDuGtHndm
கீழடியில் 10 அடி குழி தோண்ட அனுமதி கொடுக்காத ஒன்றிய அரசு, இன்று தொல்லியல் சின்னங்கள் நிறைந்த அரிட்டாபட்டியில் பல நூறு கி.மீ சுரங்கம் அமைக்க அனுமதி கொடுக்கிறது என்றால், இது தமிழ்நாட்டின் வளத்தையும், வரலாற்றையும் ஒருசேர அழிக்கின்ற முயற்சி. இந்த முயற்சியைத் தமிழ்நாடு மக்கள் எதிர்ப்பார்கள். அங்கிருக்கும் அனைத்து கிராமங்களிலும் தீர்மானங்கள் நிறைவேற்றப்பட்டிருக்கிறது. டங்ஸ்டன் சுரங்கம் அமைக்க ஹிந்துஸ்தான் ஸின்க் நிறுவனத்துக்கு கொடுக்கப்பட்டிருக்கின்ற அனுமதியை ஒன்றிய அரசு ரத்து செய்ய வேண்டும்." என்று வலியுறுத்தினார்.
