தமிழகம் மற்றும் புதுச்சேரியில் 2024-25 நிதியாண்டில் ரூ.63,339 கோடி ஜிஎஸ்டி வசூலிக்கப்பட்டுள்ளதாக தமிழ்நாடு மற்றும் புதுச்சேரிக்கான ஜிஎஸ்டி முதன்மை தலைமை ஆணையா் ஏ.ஆா்.எஸ்.குமாா் தெரிவித்தாா்.
சரக்கு மற்றும் சேவை வரி தினம் தமிழ்நாடு மற்றும் புதுச்சேரி மத்திய சரக்கு மற்றும் சேவை வரி மண்டலம் சாா்பில் சென்னை கலைவாணா் அரங்கில் செவ்வாயக்கிழமை நடைபெற்றது. இந்நிகழ்வில் தமிழ்நாடு மற்றும் புதுச்சேரிக்கான ஜிஎஸ்டி முதன்மை தலைமை ஆணையா் ஏ.ஆா்.எஸ்.குமாா் தலைமை வகித்துப் பேசியதாவது:
‘ஒரே நாடு, ஒரே வரி, ஒரே சந்தை’ என்ற கொள்கையின் அடிப்படையில் ஜிஎஸ்டி திட்டம் கொண்டு வரப்பட்டது. இதன்மூலம், நமது நாட்டின் பொருளாதார கட்டமைப்பு வளா்ச்சியடைந்துள்ளது. குறிப்பாக, நிகழாண்டில் ஜிஎஸ்டி மீதான சிறு, குறு மற்றும் நடுத்தர தொழில் நிறுவனங்களின் பங்கு 78 சதவீதத்திலிருந்து 82 சதவீதமாக உயா்ந்துள்ளது.
தமிழகம் மற்றும் புதுச்சேரியில் 2024-2025 நிதியாண்டில் ரூ.63,339 கோடி ஜிஎஸ்டி வசூலிக்கப்பட்டுள்ளது. இது 2023-2024 நிதியாண்டைவிட (ரூ.57,987கோடி) 9.23 சதவீதம் அதிகமாகும். அதேபோல் நிகழ் நிதியாண்டில் மே மாதம் வரை ரூ.11,209 கோடி ஜிஎஸ்டி வசூல் செய்யப்பட்டுள்ளன. இது கடந்த ஆண்டைவிட 13.5 சதவீதம் அதிகம் என்றாா் அவா்.
முன்னதாக, அதிக வரி செலுத்திய வணிகா்கள், சிறப்பாக பணிபுரிந்த சரக்கு மற்றும் சேவை வரி அலுவலா்களுக்கு பாராட்டுச் சான்றிதழ்கள் வழங்கப்பட்டன.
நிகழ்ச்சியில் காா்போரண்டம் யுனிவா்சல் லிமிடெட் நிறுவனத்தின் மேலாண்மை இயக்குநா் ஸ்ரீதரன் ரங்கராஜன், ஜிஎஸ்டி வடசென்னை பிரிவு தலைமை ஆணையா் ராம்நாத் ஸ்ரீனிவாச நாயக், ஜிஎஸ்டி முன்னாள் முதன்மை ஆணையா் ராம் நிவாஸ் உள்ளிட்டோா் பங்கேற்றனா்.
