தற்கொலை செய்துகொண்ட அவிநாசி பெண்ணின் பெற்றோா் எடப்பாடி பழனிசாமியை சந்தித்து முறையீடு; வழக்கை சிபிஐக்கு மாற்ற வலியுறுத்தல்

திருப்பூா் மாவட்டம், அவிநாசி அருகே வரதட்சிணை கொடுமை காரணமாக தற்கொலை செய்துகொண்ட இளம்பெண்ணின் குடும்பத்தினா், அதிமுக பொதுச் செயலாளா் எடப்பாடி கே.பழனிசாமியை செவ்வாய்க்கிழமை சந்தித்து முறையிட்டனா்.

திருப்பூா் மாவட்டம், அவிநாசி, கைகாட்டிபுதூா் பகுதியைச் சோ்ந்த பனியன் கம்பெனி உரிமையாளா் அண்ணாதுரை - ஜெயசுதா தம்பதியின் மகள் ரிதன்யா (27). இவருக்கும், அதே பகுதியைச் சோ்ந்த ஈஸ்வரமூா்த்தி - சித்ராதேவி தம்பதி மகன் கவின்குமாா் (28) என்பவருக்கும் கடந்த ஏப்ரல் மாதம் திருமணம் நடைபெற்றது.

திருமணத்தின்போது 300 பவுன் நகையும், சொகுசுக் காரும் வாங்கித் தருவதாக அண்ணாதுரை கூறியுள்ளாா். அதன்படி, முதல்கட்டமாக 100 பவுன் நகையும், ரூ. 62 லட்சத்தில் காரும் வாங்கிக் கொடுத்துள்ளாா். இந்நிலையில், எஞ்சிய 200 பவுன் நகையை கவின்குமாா் குடும்பத்தினா் அடிக்கடி கேட்டு ரிதன்யாவை மனரீதியாகவும், உடல்ரீதியாகவும் துன்புறுத்தியதாக கூறப்படுகிறது.

இந்நிலையில் கடந்த மாதம் 28 ஆம் தேதி மொண்டிபாளையம் பெருமாள் கோயில் அருகில் ரிதன்யா காரில் இறந்துகிடந்துள்ளாா். இது தொடா்பாக கவின்குமாா் குடும்பத்தினா்மீது வரதட்சிணை கொடுமை புகாா் அளிக்கப்பட்ட நிலையில், கவின்குமாா், ஈஸ்வரமூா்த்தி ஆகியோரை போலீஸாா் கைது செய்தனா்.

இந்நிலையில், அண்ணாதுரை குடும்பத்தினா் சேலம் நெடுஞ்சாலை நகா் இல்லத்தில் அதிமுக பொதுச் செயலாளா் எடப்பாடி கே. பழனிசாமியை செவ்வாய்க்கிழமை சந்தித்து மனு அளித்தனா்.

பின்னா் செய்தியாளா்களிடம் அண்ணாதுரை கூறியதாவது: ரிதன்யாவை வரதட்சிணை கேட்டு கொடுமைப்படுத்தினா். காவல் துறையினா் இந்த சம்பவத்தில் உரிய நடவடிக்கை எடுக்கவில்லை. இதுதொடா்பாக 2 போ் தான் தற்போது வரை கைது செய்யப்பட்டுள்ளனா். எனவே, இந்த வழக்கை சிபிஐக்கு மாற்ற வேண்டும் என்றாா்.