திருப்பத்தூரில் அடுத்தடுத்த 5 கடைகளில் திருட்டு

சிவகங்கை அருகே, திங்கள்கிழமை நள்ளிரவில் அடுத்தடுத்த 5 கடைகளின் பூட்டுகளை உடைத்து, நடைபெற்ற திருட்டுச் சம்பவம் குறித்து போலீஸாா் விசாரணை நடத்தி வருகின்றனா்.

சிவகங்கை மாவட்டம், திருப்பத்தூா் - சிவகங்கை சாலையிலுள்ள ஊராட்சி ஒன்றிய அலுவலகத்துக்கு அருகில் 2 நிதி நிறுவனங்கள், முடி திருத்தகம், மளிகைக் கடை, நுட வைத்தியச் சாலை என 5 கடைகள் செயல்பட்டு வந்தன.

இந்த நிலையில், அதே சாலையில் கொட்டகைக் கடை வைத்திருப்பவா் செவ்வாய்க்கிழமை காலையில் தன்னுடைய கடையைத் திறந்தபோது, அருகிலுள்ள கடைகளின் பூட்டுகள் உடைக்கப்பட்டிருந்ததைக் கண்டு, சம்பந்தப்பட்டவா்களுக்குத் தகவல் தெரிவித்தாா்.

அவா்கள் அளித்த புகாரின்பேரில், அங்கு வந்த போலீஸாா் திருட்டு நடந்த கடைகளை ஆய்வு செய்தனா். இதில், கதிா்வேல் நடத்தி வந்த நிதி நிறுவனத்தில் 10 ஜோடி வெள்ளிக் கொலுசுகள், ரவியின் நிதி நிறுவனத்தில் ரூ.6,000 பணம், முடி திருத்தகத்தில் ரூ1,500, நுட வைத்தியச் சாலையில் ரூ.2,000 பணம், மளிகைக் கடையில் பொருள்கள் ஆகியவை திருடுபோனது தெரிய வந்தது.

இதையடுத்து, அருகிலிருந்த கண்காணிப்பு கேமராவில் போலீஸாா் ஆய்வு செய்தபோது, மா்ம நபா் ஒருவா் கடப்பாரையால் கடைகளின் பூட்டுகளை உடைத்து திருட்டில் ஈடுபட்டது தெரிய வந்தது. இந்தச் சம்பவம் குறித்து திருப்பத்தூா் நகா் காவல் நிலைய போலீஸாா், வழக்குப் பதிந்து விசாரணை நடத்துகின்றனா்.