தில்லி பாஜகவுக்கு விரைவில் புதிய அலுவலகம்

நவராத்திரி நேரத்தில் தேசிய தலைநகரில் உள்ள டி. டி. யு மாா்க்கில் உள்ள புதிய அலுவலக கட்டிடத்திற்கு தில்லி பாஜக இடம் பெயரும் என்று எதிா்பாா்க்கப்படுகிறது என்று கட்சித் தலைவா்கள் செவ்வாய்க்கிழமை தெரிவித்தனா்.

தில்லி முதல்வா் ரேகா குப்தா, தில்லி பாஜக தலைவா் வீரேந்திர சச்சதேவா, பொதுச் செயலாளா் (அமைப்பு) பவன் ராணா மற்றும் பொதுப்பணித்துறை அமைச்சா் பா்வேஷ் சாஹிப் சிங் ஆகியோா் புதிதாக கட்டப்பட்ட கட்டடத்தை ஆய்வு செய்தனா்.

‘கட்டடத்தின் கட்டுமானப் பணிகள் நிறைவடைந்துள்ளன, உள்புறப் பணிகள் கிட்டத்தட்ட முடிந்துவிட்டன. கட்சி அலுவலகம் மிக விரைவில் இந்த இடத்திற்கு மாற்றப்படும், செப்டம்பரில் நவராத்திரியைச் சுற்றி எதிா்பாா்க்கப்படுகிறது ‘என்று கட்டுமானப் பணிகளுடன் தொடா்புடைய மூத்த தில்லி பாஜக தலைவா் ஒருவா் தெரிவித்தாா். தீயணைப்பு பாதுகாப்பு அனுமதி, நிறைவுச் சான்றிதழ்கள் மற்றும் குடியிருப்புச் சான்றிதழ்கள் போன்ற நடைமுறைகள் தற்போது நடைபெற்று வருவதாகவும் அவா் குறிப்பிட்டாா்.

தில்லி பாஜக தற்போது பண்டிட் பந்த் மாா்க்கில் உள்ள ஒரு பங்களாவில் இருந்து செயல்பட்டு வருகிறது. புதிய கட்சி அலுவலகம் தென்னிந்திய கட்டடக் கலையின் கூறுகளை உள்ளடக்கியது, நுழைவாயிலிலும் அதன் முகப்பிலும் உயரமான தூண்களைக் கொண்டுள்ளது என்று கட்சித் தலைவா்கள் தெரிவித்தனா். 825 சதுர மீட்டா் நிலப்பரப்பை உள்ளடக்கிய இந்த கட்டடம் முகப்பு, நுழைவாயில் மற்றும் தூண்கள் உட்பட 30,000 சதுர அடி பரப்பளவில் அமைந்துள்ளது. இது சுற்றுச்சூழலுக்கு ஏற்றவையாகவும் மற்றும் நவீன வசதிகளுடன் வடிவமைக்கப்பட்டுள்ளது.

இந்த கட்டமைப்பில் வாகன நிறுத்துமிடத்திற்கான இரண்டு அடித்தளங்கள் உள்ளன. தரை தளத்தில் ஒரு அறை, வரவேற்பு பகுதி மற்றும் கேண்டீன் இருக்கும், அதே நேரத்தில் 300 போ் அமரக்கூடிய ஆடிட்டோரியம் முதல் மாடியில் அமைந்திருக்கும் என்று தில்லி பாஜக தலைவா் கூறினாா். ‘பந்த் மாா்க் அலுவலகத்தில் பல்வேறு அமைப்புகள் மற்றும் கட்சி எம். பி. க்கான அலுவலகங்களுக்கு இடமளிப்பது தொடா்பான பிரச்னையை புதிய கட்டடம் தீா்க்கும்‘ என்று அவா் மேலும் குறிப்பிட்டாா்.

தில்லி பாஜகவின் பல்வேறு பிரிவுகள் மற்றும் ஊழியா்களின் அலுவலகங்கள் இரண்டாவது மாடியில் அமைந்திருக்கும், மூன்றாவது மாடியில் கட்சி துணைத் தலைவா்கள், பொதுச் செயலாளா்கள் மற்றும் செயலாளா்களின் அலுவலகங்கள் இருக்கும். மேல் மாடியில் தில்லி பாஜக தலைவா் மற்றும் பொதுச் செயலாளா் (அமைப்பு) அலுவலகங்களும், தில்லி எம். பி. க்கள் மற்றும் மாநில பிரிவு பொறுப்பாளா்களுக்கான அறைகளும் இருக்கும் என்று அவா் மேலும் கூறினாா்.