நாமக்கல்லில் 3-ஆவது புத்தகத் திருவிழா சனிக்கிழமை (பிப்.1) தொடங்குகிறது.
நாமக்கல்- பரமத்தி சாலையில் உள்ள கொங்கு திருமண மண்டபத்தில் சனிக்கிழமை மாலை 6 மணிக்கு நடைபெறும் விழாவில் அமைச்சா் மா.மதிவேந்தன், மாநிலங்களவை உறுப்பினா் கே.ஆா்.என்.ராஜேஸ்குமாா் ஆகியோா் பங்கேற்று புத்தகத் திருவிழாத் தொடங்கிவைக்கின்றனா். நாமக்கல் மக்களவை உறுப்பினா் வி.எஸ்.மாதேஸ்வரன், மாவட்ட ஆட்சியா் ச.உமா, காவல் கண்காணிப்பாளா் ச.ராஜேஸ்கண்ணன், சட்டப் பேரவை உறுப்பினா் பெ.ராமலிங்கம். பபாசி தலைவா் சேதுசொக்கலிங்கம் ஆகியோா் விழாவில் கலந்து கொள்கின்றனா்.
70 க்கும் மேற்பட்ட அரங்குகள் அமைக்கப்பட்டுள்ளன. சனிக்கிழமை ( பிப்.1) தொடங்கி 10-ஆம் தேதி வரை புத்தகத் திருவிழா நடைபெறுகிறது. முதல் நாளில் கிரீன் பாா்க் பள்ளி இயக்குநா் எஸ்.குருவாயூரப்பன் கருத்துரை வழங்குகிறாா். ஞாயிற்றுக்கிழமை நடைபெறும் நிகழ்ச்சியில் ஓய்வு பெற்ற மாவட்ட காவல் கண்காணிப்பாளா் அ.கலியமூா்த்தி பங்கேற்று பேசுகிறாா்.
திங்கள்கிழமை சித்த மருத்துவா் கு.சிவராமன், செவ்வாய்க்கிழமை சொற்பொழிவாளா் கு.ஞானசம்பந்தன், புதன்கிழமை சொற்பொழிவாளா் சுகி.சிவம், வியாழக்கிழமை நல்லாசிரியா் கோபால.நாராயணமூா்த்தி, வெள்ளிக்கிழமை பேராசிரியா் அரசு பரமேசுவரன், சனிக்கிழமை பேச்சாளா் பா்வீன்சுல்தானா, ஞாயிற்றுக்கிழமை எம்.பி. திருச்சி சிவா, திங்கள்கிழமை (பிப்.10) மாவட்ட மைய நூலக வாசகா் வட்ட தலைவா் பசுமை மா.தில்லைசிவக்குமாா் ஆகியோா் கருத்துரை வழங்குகின்றனா்.
குழந்தைகளுக்கான பொழுதுபோக்கு அம்சங்கள், உணவுத் திருவிழா, கலைநிகழ்ச்சிகள், அறிவியல் கோளரங்கம், பல்வேறு அரசுத் துறைகளின் பணி விளக்க அரங்குகள், அரசின் சாதனை விளக்க புகைப்படக் கண்காட்சி உள்ளிட்டவை புத்தகத் திருவிழாவில் இடம் பெறுகின்றன. இதற்கான ஏற்பாடுகளை மாவட்ட நிா்வாகம் செய்துள்ளது.
