தமிழகத்தில் சாலை மேம்பாட்டுத் திட்டத்தின்கீழ் நிகழ் ஆண்டில் 254.32 கிமீ மாநில நெடுஞ்சாலைகளை அகலப்படுத்தும் பணிகள் நடைபெற்று வருகின்றன என்று பொதுப்பணி, நெடுஞ்சாலைகள் துறை அமைச்சா் எ.வ.வேலு கூறினாா்.
நாமக்கல் மாவட்டம், திருச்செங்கோடு கரட்டுப்பாளையத்தில் வெள்ளிக்கிழமை நடைபெற்ற நிகழ்ச்சியில், ஓமலூா்- சங்ககிரி- பரமத்தி இடையே நான்கு வழிச் சாலை அமைக்கும் திட்டப் பணிகளை பூமி பூஜை செய்து தொடங்கி வைத்து அவா் பேசியதாவது:
தமிழகத்தில் சாலை மேம்பாட்டுத் திட்டத்தின்கீழ் மாவட்டம், வட்டத்தின் தலைமையிடங்களை இணைக்கும் முக்கிய மாநில நெடுஞ்சாலைகள் நான்கு வழிச் சாலைகளாக விரிவுபடுத்தப்படுகின்றன.
கடந்த 2021-22 ஆம் நிதியாண்டில் 253.62 கிமீ சாலைகள், 2022-23-இல் 157.10 கிமீ சாலைகள், 2023-24-இல் 166.22 கி.மீ. சாலைகள் அகலப்படுத்தப்பட்டன. நிகழ் நிதியாண்டில் 254.32 கி.மீ. சாலைகள் அகலப்படுத்தும் பணி நடைபெற்று வருகின்றன.
நாமக்கல் மாவட்டத்தில் கடந்த மூன்று ஆண்டுகளில் நெடுஞ்சாலைத் துறை சாா்பில் 227 பணிகள் ரூ. 412 கோடியில் மேற்கொள்ளப்பட்டுள்ளன. நிகழ் நிதியாண்டில் ரூ.154 கோடியில் 57 திட்டப் பணிகள் விரைவில் தொடங்கவுள்ளது.
நெடுஞ்சாலைத் துறையின் கிராமச் சாலைகள் அலகின்கீழ், நாமக்கல் மாவட்டத்தில் கடந்த மூன்று ஆண்டுகளில் ரூ. 67 கோடியில் ஊராட்சி ஒன்றிய சாலைகள் தரம் உயா்த்தப்பட்டுள்ளன. மேலும், 37 சாலைப் பணிகளுக்கு ரூ. 64 கோடி ஒதுக்கீடு செய்யப்பட்டுள்ளது. கொல்லிமலை செல்லும் மலைப் பாதையில் விபத்துகளைக் குறைக்க ரூ.10 கோடியில் சாலையோரங்களில் சிறப்பு தடுப்பான்கள் அமைக்கப்பட்டுள்ளன என்றாா்.
முன்னதாக, திருச்செங்கோடு புறவழிச் சாலைப் பணிகளை பாா்வையிட்டு ஆய்வு மேற்கொண்டாா். மேலும், நெடுஞ்சாலைத் துறை சாா்பில் சாலையோரங்களில் மரக் கன்றுகள் நடும் பணிகளை தொடங்கி வைத்தாா்.
நிகழ்ச்சியில் அமைச்சா் மா.மதிவேந்தன், ஆட்சியா் ச.உமா, திருச்செங்கோடு சட்டப் பேரவை உறுப்பினா் ஈ.ஆா்.ஈஸ்வரன், நாமக்கல் எம்.பி. வி.எஸ்.மாதேஸ்வரன், நகரமைப்பு மண்டல திட்டக் குழு உறுப்பினா் எஸ்.எம்.மதுரா செந்தில், நெடுஞ்சாலைத் துறை தலைமைப் பொறியாளா் கு.கோ.சத்தியபிரகாஷ், திருச்செங்கோடு நகராட்சித் தலைவா் நளினி சுரேஷ்பாபு, துணைத் தலைவா் காா்த்திகேயன், நெடுஞ்சாலைத் துறை சிறப்பு அலுவலா் (தொழில்நுட்பம்) இரா.சந்திரசேகா், சேலம் கண்காணிப்பு பொறியாளா் சசிக்குமாா் உள்பட பலா் கலந்து கொண்டனா்.
