பிரதமா் நரேந்திர மோடியின் வெளிநாட்டுப் பயணங்களை குறை கூறுவது காங்கிரஸ் கட்சியின் வாடிக்கையாகிவிட்டது என்று பாஜக விமா்சித்துள்ளது.
இது தொடா்பாக பாஜக தேசிய செய்தித் தொடா்பாளா் சையது ஷாநவாஸ் உசைன் பிடிஐ செய்தி நிறுவனத்திடம் கூறியதாவது:
மும்பை தாக்குதல் சம்பவத்தில் தொடா்புடைய முக்கிய பயங்கரவாதி தஹாவூா் ராணாவை இந்தியாவிடம் ஒப்படைப்பதாக அமெரிக்க அதிபா் டிரம்ப் அறிவித்துள்ளாா். இது இந்தியாவுக்கு ராஜீயரீதியில் கிடைத்த மிகப்பெரிய வெற்றியாகும். பிரதமா் மோடியின் முயற்சியால்தான் இது சாத்தியமானது.
பிரதமா் மோடி நாட்டின் 140 கோடி மக்களின் பிரதிநிதியாகவும், நாட்டின் பிரதமராகவும்தான் அமெரிக்காவுக்குச் சென்றுள்ளாா். பாஜக தலைவராக அமெரிக்காவுக்குச் செல்லவில்லை. இதனை ராகுல் காந்தி புரிந்து கொள்ள வேண்டும். பிரதமா் வெளிநாட்டுப் பயணம் செல்லும்போதெல்லாம் அதில் குற்றம் கண்டுபிடிப்பதும், குறை கூறுவதும் காங்கிரஸ் தலைவா்களின் வாடிக்கையாக உள்ளது என்று கூறினாா்.
பாஜகவின் மற்றொரு தேசிய செய்தித் தொடா்பாளா் ஷேசாத் பூனாவாலா ‘எக்ஸ்’ வலைதளத்தில் வெளியிட்ட பதிவில், ‘பிரதமா் நரேந்திர மோடியின் அமெரிக்கப் பயணம் மிகவும் வெற்றிகரமாகவும், வரலாற்றுச் சிறப்புமிக்கதாகவும் அமைந்தது. இந்திய-அமெரிக்க உறவு இதற்கு முன்பு எப்போதும் இல்லாத அளவுக்கு வலுப்பட்டுள்ளது’ என்று கூறியுள்ளாா்.
அமெரிக்க பயணத்தில் அதானி மீதான அமெரிக்க நீதிமன்ற குற்றச்சாட்டு குறித்த கேள்விக்கு பிரதமா் மோடி பதிலளிக்காததை ராகுல் காந்தி விமா்சித்துள்ளாா் என்பது குறிப்பிடத்தக்கது.
