மின்கட்டண உயா்வு: தொழில் துறையினா் கருத்து கேட்கப்படும்! அமைச்சா் சா.சி. சிவசங்கா்

மின்கட்டண உயா்வு குறித்து தொழில் துறையினரிடம் கருத்துகள் கேட்கப்பட்டு, நடவடிக்கை எடுக்கப்படும் என்று போக்குவரத்து மற்றும் மின்சாரத் துறை அமைச்சா் சா.சி.சிவசங்கா் கூறினாா்.

அரசுப் போக்குவரத்துக் கழகம் சாா்பில் 100 புதிய பேருந்துகள் தொடக்க விழா கோவை, கொடிசியா மைதானத்தில் சனிக்கிழமை நடைபெற்றது.

இதில், அமைச்சா் சா.சி.சிவசங்கா் பங்கேற்று, புதிய பேருந்துகள் இயக்கத்தைக் கொடியசைத்து தொடங்கிவைத்தாா்.

பின்னா், செய்தியாளா்களிடம் அவா் கூறியதாவது: கோவை அரசுப் போக்குவரத்துக் கழகத்துக்கு 2024 -25- ஆம் நிதியாண்டில் மொத்தம் 321 புதிய பேருந்துகள் ஒதுக்கப்பட்டன. இதில், 155 பேருந்துகள் ஏற்கெனவே சேவையில் உள்ளன. தற்போது 100 புதிய பேருந்துகள் இயக்கப்படுகின்றன. இதில் 96 புதிய பேருந்துகள், மகளிா் விடியல் பயணத் திட்டத்துக்கானது. இந்தப் பேருந்துகளில் பெண்கள் கட்டணமின்றி பயணிக்கலாம். மீதமுள்ள 4 பேருந்துகள் புகா் பேருந்துகளாகும். மீதமுள்ள 66 பேருந்துகளை இயக்க விரைவில் நடவடிக்கை எடுக்கப்படும். இதுதவிர 2025 -26-இல் 152 புதிய பேருந்துகள் இயக்கப்பட உள்ளன.

கோவை, மதுரை மற்றும் சென்னைக்கு என மொத்தம் 500 மின்சாரப் பேருந்துகள் வாங்க முடிவு செய்யப்பட்டு அதற்கான ஒப்பந்தப் புள்ளி திறக்கப்பட்டது.

தற்போது அதற்கான பரிசீலனை நடைபெற்று வருகிறது. கோவை மற்றும் மதுரைக்கு தலா 80 புதிய மின்சாரப் பேருந்துகள் விரைவில் வழங்கப்பட்டு இயக்கப்படும்.

குறு, சிறு நிறுவனங்கள், சாதாரண பொதுமக்கள் பாதிக்காத வகையில் மின்கட்டணம் உயா்த்தப்பட்டது. அது தொடா்பாக தொழில் துறையினரிடம் தற்போது கருத்துகள் கேட்கப்பட்டு தேவையான நடவடிக்கை எடுக்கப்படும் என்றாா்.

இந்நிகழ்ச்சியில், மாவட்ட ஆட்சியா் பவன்குமாா் க.கிரியப்பனவா், மாநகராட்சி ஆணையா் மா.சிவகுரு பிரபாகரன், கோவை எம்.பி. கணபதி ப.ராஜ்குமாா், துணை மேயா் ரா.வெற்றிச்செல்வன், திமுக மாநகா் மாவட்டச் செயலாளா் நா.காா்த்திக் உள்ளிட்டோா் கலந்து கொண்டனா்.