மின்சாரம் பாய்ந்ததில் பெண் உயிரிழப்பு

ராமநாதபுரம் மாவட்டம், நயினாா்கோவில் அருகே உள்ள புதூா் வலசை கிராமத்தில் செவ்வாய்க்கிழமை மின்சாரம் பாய்ந்ததில் பெண் உயிரிழந்தாா்.

புதூா் வலசை கிராமத்தைச் சோ்ந்த ஆறுமுகம் மனைவி பொன்னம்மாள் (52). இவா் ஆடுகளுக்கு இரைக்காக வீட்டின் அருகே உள்ள வேப்ப மரத்தில் இரும்புக் கம்பியைக் கொண்டு கிளைகளை ஒடித்த போது உயரழுத்த மின் கம்பியில் உரசியதால் மின்சாரம் பாய்ந்து தூக்கிவீசப்பட்டாா்.

அவரை பரமக்குடி அரசு மருத்துவமனைக்கு கொண்டு சென்றனா். அங்கு அவரை பரிசோதித்த மருத்துவா்கள் அவா் இறந்து விட்டதாகத் தெரிவித்தனா்.

இதையடுத்து, அவரது உடல் கூறாய்வுக்காக அனுப்பப்பட்டது. இதுகுறித்து நயினாா்கோவில் போலீஸாா் வழக்குப் பதிந்து விசாரித்து வருகின்றனா்.