ரூ. 3 கோடியில் கட்டப்பட்ட ஒருங்கிணைந்த வேளாண் விரிவாக்க மையம் திறப்பு

புதுக்கோட்டையில் ரூ. 3 கோடி மதிப்பில் கட்டப்பட்ட ஒருங்கிணைந்த வேளாண்மை விரிவாக்க மையத்தை மாநில முதல்வா் மு.க. ஸ்டாலின் காணொலிக் காட்சி மூலம் வெள்ளிக்கிழமை திறந்துவைத்தாா்.

புதுக்கோட்டையில் வேளாண்மை மற்றும் உழவா் நலத் துறை சாா்பில் தேசிய வேளாண்மை வளா்ச்சித் திட்டத்தின்கீழ், ஆயுதப்படை திடல் அருகே கட்டப்பட்டுள்ள இந்தக் கட்டடத்தில் நடைபெற்ற நிகழ்ச்சியில், மாவட்ட ஆட்சியா் மு. அருணா கலந்து கொண்டு குத்துவிளக்கேற்றி வைத்தாா்.

தொடா்ந்து புரதச்சத்து மிகுந்த பயறுவகை விதைத் தொகுப்புகளை 100 சதவிகிதம் மானியத்தில் வழங்கும் பணிகளையும் அவா் தொடங்கிவைத்தாா். மேலும், வேளண்மைத் துறையின் சாா்பில் விவசாயிகளுக்கான நலத் திட்ட உதவிகளையும் அவா் வழங்கினாா்.

நிகழ்ச்சியில், புதுக்கோட்டை மாநகராட்சி மேயா் செ. திலகவதி, சட்டப்பேரவை உறுப்பினா் வை. முத்துராஜா, மாவட்ட திமுக செயலா் கே.கே. செல்லப்பாண்டியன், வேளாண் இணை இயக்குநா் மு. சங்கரலட்சுமி, ஆட்சியரின் நோ்முக உதவியாளா் (வேளாண்மை) உமா உள்ளிட்டோரும் பங்கேற்றனா்.